uMthunywa
YiNtatheli kaMthunywa
INTSHA yakulezinsuku izakuthakazelela ukuzwa ukuthi umhlabeleli wakoBulawayo owaziwa ngokuthi nguD’lax njalo ecula ihip-hop usekhiphe idlalade elitsha elilengoma eziyisikhombisa.
Idlalade leli elibizwa ngokuthi Representing liqukethe ingoma uD’lax ogama lakhe lokuzalwa nguMcebisi Dlamini azilobela zona.
Phakathi kwengoma ezikudlalade leli kulethi Kusasa kuyizolo, Work no play, Ingculaza, sengikhathele, Song for mama, Ngaze benzeni lengoma ethiwe elithi The Struggle.
“Ezomculo ngaqala ukuzithakazelela ngisesemncane kodwa ngaqala ukugxila kikho sengisesikolo Embakwe High School lapho esabumba iqembu labanye bami. Sasikuthanda ukuhlabela okokuthi sasihlala sicula siphinde silibazise abanye abafundi,” kutsho u D’lax.
Uchaze ukuba idlalade lakhe uRepresenting ulikhuphe elenjongo yokuchaza imizwa etshiyeneyo abantu ababalayo kodwa behluleke ukuyiphumisela phandle.
“Ingoma ezikudlalade leli ngaziloba ngilomqondo wokuthi ngizame ukuchasisa imizwa yethu etshiyeneyo esiyizwayo njengabantu kodwa esehluleka ukuchaza njani kwabanye abantu ukuze sizwisisane,” ngamazwi ka D’lax la.
Kudlalade lakhe u D’lax usebenze lontombazana okuthiwa ngu Michelle obencedisa ukuhlabela ingoma ethiwa Ingculazi, leqembu leBigSize Entertainment kube kusithi uGeeky M wamncedisa ukupheka amachacho omculo wakhe.
U D’lax uphethe ngokuthi uyakholwa ukuba abahlabeleli balomlandu wokukhulumela uzulu wonke jikelele ngoba ukuhlabela kwenza umuntu enelise ukukhuluma lenhliziyo zabantu.
