uMthunywa
Cornelius Luphahla
UMHLABELELI wengoma zeGospel odabuka eSigabeni seZidulini eGwelutshena usetshengise ukutshiseka okukhulu ngokuthuthukisa imfundo esigabeni sakibo nanko phela sewanika esinye isikolo sakulindawo amabhuku njalo usesakha ikilasi kulesisikolo.
UMhlabeleli lo uziveze ngokuthi nguNkosi kaNdlovu njalo uncedisa isikolo sakibo iZidulini Primary School ngokusakhela amakilasi, asithengele amabhuku abuye njalo abhadalele abanye abafundi imfanelo zesikolo ikakhulu abaswelayo.
UMthunywa ukhulumisane loNdlovu waveza ukuthi uselesikhathi waqala ukuncedisa lesisikolo njalo ufuna ukuthuthukisa imfundo kule indawo.
“Okwenza ngancedisa isikolo seZidulini Primary yikuthi yikho engafunda khona kusukela nginguGiredi 1 ngaze ngaqeda uGiredi 7. Ngananzelela ukuthi inengi labafundi lalingaphumeleli ngenxa yezinswelo hatshi ngenxa yokwehluleka nje. Lokhu ngikutsho ngoba abanye abantwana basuka baswele impahla zokugqoka kanye lemali yokubhadala esikolo baphethe besekela ukufunda ngoba bayabe bekhangelelwa phansi ngabanye.
“Yikho ke okwadala ukuthi ngincedise abalesifiso sokufunda kule indawo. Khathesi ngibhadalela abantwana abaswelayo imfanelo zesikolo, ngithenge ingwalo zesikolo ngibuye njalo ngibancede langezinye impahla abaziswelayo. Ngikhuluma nje khathesi ngakhisa ikilasi ngoba nginanzelele ukuthi amakilasi ayasilela lapha,” kutsho uMnu Ndlovu.
UMnu Ndlovu uchaze njalo ukuthi imali yokunceda isikolo lesi uyithola ngokuhlabela njalo enye uyithola kubangane bakhe kweleUnited Kingdom njengoba ehlabelela khona.
Usobhuku wakule indawo uMnumzana Earnest Ndlovu uchaze ukuthi balokujabula okukhulu ngesenzo somhlabeleli lo oyisizalwane sakulindawo.
“Kuyajabulisa okwenziwa ngumhlabeleli lo ngoba isikolo sethu sasingelangwalo abantwana bengaphumeleli kuhle kodwa khathesi inengi labo lenza kuhle esikolo. Ngakho-ke siyambonga kakhulu ngosekelo alwenzayo ekuthuthukiseni imfundo lapha,” kuphetha uMnu Ndlovu.
