uMthunywa
lntatheli kaMthunywa
KULOMFUNDISI webandla leZion Church ophinda abe ngusobhuku wesigaba seSiyoka eBeitbridge oleminyaka engu-65 omithise umfundi okuFomu 2 kulandela ukumbamba iganyavu, uMthunywa uyakuveza lokhu lamhlanje.
UMfundisi uManala Moyo kuvele kuviki ephelileyo ukuthi ngemva kokudala icala leli wathembisa umamangala ukuthi angavele ayithi vu indaba le, uzamquma ngengqamu afe.
Esinye isihlobo esingeke sasiqamba ngebizo ngenhloso yokuvikela umntwana uveze ukuthi batshaqekile ngesenzo esenziwe ngumuntu ohloniphekayo esigabeni sabo okukhangelelwe ukuthi ahloniphe amalungelo abantwana.
“Umntwana lo ubehlala logogo wakhe kungakho ubhubhe kuviki ephelileyo abantu bathe bebuthene, obabakazi basebenanzelela ukuthi umntwana usemi kubi basebembuza wachaza ukuthi umfundisi nguye owamhlukuluzayo.
“Uthe umfundisi lo wayebuya ngakibo azomhlukuluza njengoba ugogo wayevele esegula wayengelamandla okuthi ambuze ngayekwenza,” kuchaza isihlobo lesi.
Uqhubekele phambili njalo esithi kukhanya umfundisi lo wayelaye umntwana ukuthi angachazi ukuthi nguye omenze isihluku lesi.
“Isenzo sikamfundisi sethuse wonke umuntu esigabeni ngoba njengosobhuku njalo waphinda watshela umntwana ukuthi angavele achaze ukuthi umhlukuluzile uzambulala kungakho bekunzima ukuthi umntwana lo akhulume ngakho,” kuchaza isihlobo lesi.
Kuzwakale njalo ukuthi kwelinye ilanga umfundisi lo ezohlukuluza umntwana wathutsha egqoke isudu wamnika isivalamlomo seR100 ukuze angatsheli muntu.
UMthunywa uzwe udletshana njalo lokuthi umfundisi lo kuminyaka edluleyo wake wathandana lomnawakhe womkakhe laye wacina ezithwala.
UMthunywa uzwe njalo ukuthi izihlobo zomfundi zihle zabikela amapholisa okubangele ukuthi abotshwe umfundisi.
Isikhulumi samapholisa esabelweni seMatabeleland South sibuzwa ngendaba kamfundisi omithise umfundi uthe kalukafiki ewofisini yakhe.
“Udaba lolu kalukafiki ewofisini yethu kodwa ngizaludingisisa.
“Sithanda ukuthi njengamapholisa sixwayise uzulu ukuthi afundise abantwana ngokuhlukuluzwa ukuze abantwana bangahlukuluzwa benelise ukubikela abazali babo loba amapholisa aseduzane labo,” kuphetha uInsp ndebele.
