uMthunywa
Wayne Ncube loBongani Ndlovu
KULOMFUNDISI webandla le-Apostolic Faith Mission in Zimbabwe (AFM) eselokitshini leMganwini koBulawayo opikisa izakhamizi zesifazana ezihlala duzane lebandla leli nanko phela kubikwa ulomkhuba wokukhiphela egcekeni isitho sakhe sangasese, uMthunywa uyakuveza lokhu lamhlanje.
UMnumzana Babylon Nemiah ofundela ukuba ngumfundisi njalo ogcine amaguma ebandla leli uhlaselwe yizakhamizi zakule indawo ngoMgqibelo odluleyo zimsola ngomkhuba wakhe wokuthi angabona owesifazana uhle avele akhiphele phandle isitho sakhe sangasese.
Kunkulumo etetshiweyo kuzwakala abesifazana abahlala duzane kwesonto le bemgcona ngokubanqunulela angababona begqoke impahla ezimfitshane, bekhotheme bethanyela loba bethandele amalembu.
UMnu Nemiah uzwakala kunkulumo le esithi abesifazana laba babuyelani esontweni begqoke impahla ezimfitshane yikho laye ecina ekhiphela phandle isitho sakhe sangasese ngoba kungekho angakwenza ngoba bemlimaza.
UMthunywa uzwe ukuthi uNkosazana Portia Ndlovu wathi ebona isitho sikamfundisi lo sisegcekeni kazange athande ukuphozisa amaseko kodwa wahle wamqonda wayambuza ukuthi kungani engamhloniphi kodwa waphendula enganaki esithi lokho ukwenza ngoba ekhulelwa yimizwa nxa engabona owesifazana engagqokanga kuhle.
Intatheli zikaMthunywa zivakatshele elokitshini leli, zezwa ukuba uMnu Nemiah, oseleminyaka emine ehlala esontweni le, uhlala eveza ihlazo engakutshayi indiva.
“Akulamuntu ongumama ohlala ezindlini eziduzane lesonto le ongakaze abone ihlazo lalubaba ngoba angavele ambone okwesikhatshana kungathutshi muntu uyakhiphela isitho sakhe phandle. Kwezinye izikhathi angathi esiyageza angabona owesifazana phandle uhle avele agezele phandle.
“Bonke abake bamlanda ngaphambilini bembuza ngesenzo sakhe lesi uvele avale ngokuthi omama balapha yibo abamqalayo ngokuhamba benqunu besiyamngenela lapho agezela khona, kodwa konke lokhu kungamanga ngoba akula muntu ophilileyo engqondweni ongasuka endlini yakhe engagqokanga elanda indoda yomuntu,” kuchaza esinye isakhamuzi uSandra Nkomo ngolaka.
UNkosazana Zodwa Dube uthe uMnu Nemiah usebathwalise nzima ngoba kabasakhululekanga ngitsho njengabesifazana ngenxa yokungahloniphi kwalubaba.
“Ubaba lo ulihlazo kwabanye abafundisi, kamhloniphi ngitsho umuntu wesifazana ngoba angavele ambone nje kumbe ekhotheme uhle akhiphele phandle isitho sakhe.
“Ubaba lo uthethe kodwa kakunaki ngitsho lokhu ngoba labantwabethu kwezinye izikhathi labo bayambona eveze ubunqunu bakhe. Sesize sibona angathi umfundisi lo angabe elomubobobo ngoba kungathi ukwenza kwakhe akukodwa,” kutsho uNkszn Dube.
Izakhamizi zakulelilokitshi zihlale phansi lamalunga esonto le kanye labakhulu bakaZibuthe wakulindawo, lapho uMnu Nemiah avume khona ethi bona bafuna enzeni nxa omama bemhambela nqunu.
Kubikwa kulezakhamizi ezitshengisele ebandleni leli ngeSonto ziveza ukukhathazeka ngokuziphatha kukaMfundisi uNemiah osekulesikhathi eside kusenzakala kodwa abakhokheli bebandla leli bakhanye bembambatha indaba le.
“Abakhokheli besonto le bacele uzulu obekhona kumhlangano wangeSonto ukuthi kungabi lomuntu ozathi vu indaba le ngakho kuhle kwavele ukuthi bazama ukuyimbambatha ngoba umfundisi lo laye uthe akulanto abangamenza yona ngoba omama bakuleli cele elisekele isonto kuyibo abaphambanisayo ngokumnqunulela,” kulandisa uNksz Dube.
Intatheli ziphinde zakhulumisana loMgcinisihlalo kaZibuthe uMnumzana Sibanda oveze ukuthi akula angakukhuluma ngoba akula lutho angathi solubambeka.
“Ngeke ngakhuluma ngodaba lolu, ngicela libuye kwelinye ilanga mhlawumbe lami ngiyabe sokulento engingayitsho kodwa okwakhathesi sihlale phansi njengezakhamizi eziseduze lapha, akula omkhulu ophezu kwami osekwazi ngale indaba, sisazama ukuyiphenyisisa,” kuchaza uMgcinisihlalo uSibanda.
Imizamo yokukhulumisana loMnu Nemiah iyehlule kodwa uMthunywa wenelise ukufinyelela unkosikazi wakhe, uNkosazana Patiance Nemiah oveze ukuthi yena ubengelalwazi lokuthi umkakhe wenza ihlazo elinje nxa ebona abesifazane phandle.
“Bengingakwazi konke lokhu ukuthi umkami uyanqunulela abantu, ngakho ngicela abantu ukuthi bengakenzi isinqumo bangiphe isikhathi ngikhulume labesonto, njalo ngiyamxolisela lami, ngiyaxolisa ngesenzo sikababa,” kutsho uNkszn Nemiah.
