uMthunywa
Thokozile Mbedzi
ZlLOKHE zitshwaqe imizimba izakhamizi zelokitshini lePumula koBulawayo ngemva kokuzwa ngabafundi ababili omunye oleminyaka engu-15 lole 17 abagwazane bebanga ijaha.
Isehlalako lesi senzakale ngempelaviki ngehola lika 6 ntambama.
Abafundi laba esingeke saqamba amagama abo ngenhloso yokubavikela kubikwa baqale bejikijelana ngamatshe bacina sebegwazana ngengqamu kubangwa ijaha.
Ekhuluma lentatheli kaMthunywa uNkosazana Thabani Dube uthe babone into yamehlo.
“Sitshe imilomo ngesikwenzelwe ngabafundi laba abalwe kwabancane indawo bebanga ijaha kulokuthi baqine ngezingwalo zabo.
“Siswele lamazwi. Oleminyaka engu-15 ubevela ezitolo zePumula North lapho ahlangana khona loleminyaka engu-17 wasembuza ukuthi kungani ethandana lejaha lakhe. Umsindo wahle wathi bhe kwaqala ukulwiwa.
“Oleminyaka engu-15 wadobha ilitshe watshaya oleminyaka engu-17 kanengi ekhanda. Lokhu kwabangela ukuthi oleminyaka engu-17 laye adobhe amatshe wamtshaya laye endlebeni yesandleni senxele lekhanda.
Esebone ukuthi usekhulelwa wagijima waqonda ngakibo wayathatha ingqamu yemkulwini wafika wagwaza oleminyaka engu-17 esandleni senxele lesandleni sokudla ngemuva,” kulandisa uNkosazana Dube.
Isikhulumi samapholisa koBulawayo uInspector Abednico Ncube ebuzwa ngodaba lolu uvumile ukuthi lwenzakale.
uInspector Abednico Ncube
“Samukele umbiko wabantwana abatshayane ngamatshe omunye wacina esiyathatha ingqamu ngakibo wagwaza ngayo omunye.
“Sikhathazekile njengamapholisa ngokulwa kwabantwana endaweni abahlala kuzo. Kungakho amapholisa axwayisa uzulu ukuthi ehlukane lodlame nxa ethe waba lokungazwisisani ngoba kubangela ingozi yokulahleka kwempilo,” kuphetha uInsp Ncube.
