uMthunywa
Buhlebenkosi Gaule
KULOMFUNDI weNjube High School koBulawayo oleminyaka yokuzalwa engu-16 ophose waya kogoqwanyawo kulandela ukugwazwa ngomunye oleminyaka engu-15 kasificaminwe mibili ngengqamu.
Umsolwa esingeke samchaza igama lakhe ngoba engaphansi kweminyaka engu-16, ohlala elokitshini leMakhandeni kubikwa wahlasela umamangala ohlala eLobhengula ngoba embuze ukuthi kungani emjikijele ngesitina.
Kubikwa umsolwa wagwaza umamangala kathathu; kanye phezulu kwenhliziyo lakabili esifubeni andubana amxhonxe kahlanu emhlane mhlaka 23 Mbimbitho okwenza wayalaliswa esibhedlela.
Umtshutshisi ubikele inkundla ukuthi ngalelolanga umamangala lomsolwa bahlangana emavinkilini eWoza Woza eLobhengula bevela esikolo.
Kubikwa umamangala wabuza umsolwa ukuthi kungani emjikijele ngesitina umsolwa wathi usayatshintsha iyunifomu uyaphenduka.
Ekuphendukeni kwakhe kubikwa umamangala wambuza futhi walandula ukuthi ukwenzile.
Umamangala ngokuthukuthela wakhama umsolwa kodwa umsolwa wamkhulela wamfuqela phansi.
Umsolwa esekwenzile lokhu wakhipha ingqamu waqala ukugwaza umamangala.
Inkundla izwe ukuthi abangane bakamamangala bebona lokhu babamba umsolwa kodwa wayelokhu elamandla ngoba yikho lapho amgwaza kahlanu emhlane.
Indaba le yabikwa enkambeni yamapholisa eMagwegwe ayiwo abiza i-ambulensi eyathwalela umamangala esibhedlela seMpilo.
Umtshutshisi kulelicala bekunguMnumzana Steward Madzore.
