uMthunywa
Ethel Ncube
ZISAKHAKHAMELE izakhamizi zeNkulumane 12 koBulawayo ngemva kokuba umfana oleminyaka engu-16 yokuzalwa egwaze wabulala umakhelwane wakhe oleminyaka engu-22 kubangwa amanzi esibholaneni.
Indaba le, yenzakale ngoLwesine kuviki ephelileyo lapho umetheswacala esingeke sachaza igama lakhe, azonda wagana unwabu besemzileni wokukha amanzi esibholaneni lapho umakhelwane wakhe, uTinashe Tanaka Gweshe angezelela amabhakede ayefuna ukuwakhelela amanzi.
Kuzwakale ukuba umetheswacala waqala ukulwa lomakhelwane wakhe ethi uyababambelela, abanye ababelapho balamula.
Umetheswacala kubikwa wabuyela ngakibo wayathatha ingqamu wabuyela emzileni wamanzi wafika wathi uGweshe kamange ukuze kukhanye ukuba sebexolelene, umetheswacala wahle wamgwaza kanye esiswini wacela ezinyaweni.
Kubikwa uGweshe wasala lengqamu wahle waqonda ekilinika yeMaqhawe lapho afika wedluliselwa esibhedlela seMpilo lapho okwaqala kwamangalwa emapholiseni waselaliswa.
Mpilo hospital
Ngelanga elilandelayo uGweshe wedlula emhlabeni umetheswacala wabotshwa esetheswa icala lokubulala njalo usezandleni zamapholisa.
Isikhulumi samapholisa koBulawayo uInspector Abednico Ncube uxwayise uzulu ukuthi atshiyane lomkhuba wokulwa.
“Njengamapholisa sixwayisa abantu ukuthi batshiyane lodlame ngoba lucina lubangela ingozi ezehlukeneyo,” kubika uInsp Ncube.
