uMthunywa
Thokozile Mbedzi
ZILOKHU zinkemile izakhamizi zeNgozi Mine koBulawayo ngemva kokuba enye indoda igwaze omunye umfana wafa kubangwa imali emakhasini.
Kubikwa uKhawulani Tshuma ohlala eNgozi Mine Squatter Camp oleminyaka engu-49 yokuzalwa wagwaza uZelusile Moyo (17) weNyathi mhlaka 14 Nkwenkwezi kubangwa ukuthi umdlile emakhasini.
Ekhuluma lentatheli kaMthunywa uMnumzana Clever Mpondo uthe babone into yamehlo lapho ababili laba bebulalana kubangwa amakhasi.
“Sehlelwe liyezi elimnyama lapha eNgozi Mine nanko phela uKhawulani edliwe emakhasini lapho akade bedlala benatha utshwala njengensukwini. UZelusile ubelokhu enqoba kokuphela wacina esesithi yena usetshayisa usefuna ukuya ngekhaya.
“Lokhu akumhambanga kuhle uKhawulani ohle wamvimba ukuba angahambi wamtshaya ngenqindi ebusweni waphinda wakhupha isikhali esikhwameni sakhe wamgwaza ngaso esandleni senxele ngaphansi kwenkaba walimala kabuhlungu.
“UZelusile wopha kakhulu wabizelwa i-ambulensi kodwa ngokuswelakala kwenhlanhla wedlula emhlabeni ingakafiki,” kulandisa uMnu Mpondo.
Isikhulumi samapholisa koBulawayo uInspector Abedinico Ncube ebuzwa ngodaba lolu uthe solufikile kibo.
“Udaba lwendoda egwaze oleminyaka engu-17 sesiyamukele njalo ngithanda ukuxwayisa uzulu ukuthi kangaxazululi ingxabano ngodlame kodwa ngoxolo.
“Ukubheja amakhasi kulicala elingabophisa yiloba ngubani kungakho ke sikhuthaza abantu ukuthi bekele ukukwenza lokhu,” ngu-Insp Ncube lo.
