uMthunywa
Thokozile Mbedzi
KWEHLE iyezi elimnyama esigabeni seMananda, eFigtree ngemva kokuba umntwana oleminyaka engu-12 egalule wafa ethiya inhlanzi emfuleni.
UChibilelo Mlilo ubhubhe kuviki ephelileyo emfuleni uMananda oseFigtree.
Kuzwakale ukuba uChibilelo watshiywa ngekhaya ngabadala yena wasala waya emfuleni uMananda labangane bakhe besiyathiya inhlanzi lapho okwenzakala khona ingozi le.
Ekhuluma lentatheli kaMthunywa uMnumzana Jephat Moyo uthe balusizi ngesehlakalo lesi.
“Umfana lo kukhanya wathi efika emfuleni labangane bakhe wahlubula impahla wangena emanzini ethi ufuna ukuthiya inhlanzi.
“Wangena kuhle emfuleni uthe esephakathi laphakathi komfula wasegalula. Abangane bakhe bazama ukuthi bamkhuphe kodwa kwehlula.
“Kwabizwa abadala labo babuya behluleka ukumkhupha, okwabangela ukuthi isidumbu silale emfuleni ekuseni bavukela njalo, lapho abathola khona isidumbu sakhe sindenda emanzini, sasesikhutshwa,” kutsho uMnu Moyo.
Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uthe solufikile ehofisini yabo.
“Udaba lomntwana ogalule emfuleni solufikile ehofisini yethu. Sithanda ukuxwayisa abazali ukuthi bafundise abantwana ngengozi zokungena emanzini.
“Okwesibili sithanda ukuxwayisa futhi uzulu ukuba ngaso sonke isikhathi kumele abekwazi lapho okulabantwana khona ukuze abe leqiniso lokuba bavikelekile ngoba yiyo kuphela indlela yokuvikela ingozi ezifana lale,” kuphetha uInsp Mangena.
