uMthunywa
YiNtatheli kaMthunywa
IQEMBU le-Talen Vision alikufihli ukuba ukuphumelela kwalo ukuqansa lisiya esiqongweni seligi ka-Division One kuvula indlela yokuthi lithwale inkezo yeligi le kulisizini.
Sekudlule amasizini amathathu iTalen Vision isalela muva, isehluleka ekucineni kwesizini ngesikhathi ikhangelelwe ukuthi inqobe iye kuligi ephakemeyo iPSL.
Okwamanje selikhokhela ingalane leliqembu liphethe imiklomelo engu-30 ngemva kwemidlalo elitshumi lanye.
Ukuma esiqongweni akumangalisi umqeqetshi uMkhuphali Masuku obike ukuba uhambo lokuyanqoba iligi lusakhona.
“Lapha phela kulomjaho.
Umncintiswano usakhona ngoba ukukhokhela ilogu akutsho ukuba sesizintshantshu.
Kuzamele sibambelele ngamandla lapho, okutsho ukuba kumele sisebenze, sidlale umdlalo ozaletha amabhola emambuleni.
“Inhloso yethu njengeqembu leTalen Vision yikuthi siphethe isizini le sidlale okungcono kulesizini edluleyo,” kutsho uMasuku mhla esanda ukunqoba iqembu le-Arenel 1-0 enkundleni yeCrescent koBulawayo.
Ukwenyuka kweTalen Vision lokhu kumise iBulawayo City ebisikhokhele unompela kulogu.
Amakhosi wona atshovele muva kunombolo yesibili ngokudliwa yiMakomo 3-0 eHwange ngeviki edluleyo.
Impumela yomdlalo lo itshiye imilomo yabalandeli bomdlalo ka-Division One benkemile nanko phela bebeyidelela kakhulu ithimu yeHwange.
Kusenjalo inhlanhla yehlele ePlumtree kumpelaviki efanayo iMainline ichinsa ukunqoba ngemva kwesikhathi eside.
IMainline itshaye abafana beBinga Pirates nge 2-1.
Iqembu le-Arenel lele-Mainline kuzamele zibalekele isimo ezikuso okwakhathesi ngoba imiklomelo yazo ayithembisi ukuthi zingasila kuligi lonyaka.
Abafana abatsha kuligi i-Arenel bame kunombolo yesi-13, besekelwa yiMainline ku-12.
Ekucineni kwengalane kuhlezi izimbamgodi zeCasmyn ngemiklomelo eyisitshiya galolunye kuphela, kuthi iAjax Hotspurs eyake yadla ubhedu imumethe angu-11.
