uMthunywa
ISILOMO seKaizer Chiefs, uSiphiwe “Shabba” Tshabalala, sizizwa sihloniphekile njengoba sisanda kuhlohla amabhola angu-50 eqenjini esesilidlalele ngokuzimisela iminyaka elitshumi.
UTshabalala, okusakhulunywa ngomtshoko awuhlohla kuvulwa inkezo yomhlaba ka-2010, wenze isimanga ngoMgqibelo ebusuku iChiefs inqoba ngo 3-0 kuStellenbosch FC kumdlalo we-Last 32 yeNedbank Cup emdlalweni obuseKapa.
Ngemuva kokutshaya igoli ebelibeka iChiefs phambili ngamagoli amabili uTshabalala ujabulele leli goli ngokuthi aveze inombolo u50.
“Ngikubhale lokhu ngoba bengilindele ukuthi kube lusuku olukhulu kimi lapho ngitshayela iChiefs igoli lika-50 kusukela ngafika eqenjini eminyakeni elitshumi edluleyo. Ngijabule kakhulu futhi ngizizwa ngihloniphekile ukuthi ngenze into efana lale. IChiefs liqembu elikhulu manje nxa utshaya amagoli angu-50 eminyakeni elitshumi lokho kumele kukwenze uzizwe wahlukile labanye,” kutsho uTshabalala.
UShabba (okulibizo lokudlala adume ngalo) uthe lokhu ukubhale ngaphambi komdlalo ngenhloso yokuzifaka umfutho wokuthi aqinisekise ukuthi uyahlohla kulumdlalo weNedbank Cup.
“Sengathi ikhona into ebingitshela ukuthi ngizolishaya leli goli elimqoka. Lami bengizimisele impela kodwa iqiniso yikuthi bengingeke ngiphumelele ukwenza lokhu ngedwa ngakho kumqoka ukuthi ngibonge bonke abadlali engidlala labo manje labaseminyakeni edluleyo. Ngingumuntu oncintisana labanye ngakho ngiyazi ukuthi lokhu bekungeke kwenzeke ngingalutholi usizo losekelo engikuthola eqenjini.
“Sidlala kahle kulezi zinsuku. Osekusele nje yikuthi siqhubeke hatshi kuNedbank kuphela.”
Mayelana leNedbank uTshabalala uthe: “Makhulu amathuba okuthi siyinqobe ngoba ingeyinye yezinkomitshi sifuna ukuzithwala.
“Kuliqiniso ukuthi ngeke kube lula ngoba manengi amanye amaqembu asesimeni esifana lesethu kodwa indlela esiqale ngayo isinika amandla okuya phambili.” — Ubulembu
