uMthunywa
Thando Dube
UMCIMBI wodumo obona ngokuphiwa kwezindondo kwamatshatshazi akoMthwakazi koBulawayo ohamba ngebizo elithi Miss Mthwakazi usudluliselwe phambili kunyanga kaNcwabakazi.
Umcimbi lo okhangela ubuhle beziqabhobho ngendlela yamasiko obekumele wenziwe eBulawayo Polytechnic kuviki ephelileyo mhlaka 26 Nkwenkwezi udluliselwe phambili.
Ekhuluma lentatheli uFelicity Dube ongumqondisi walumcimbi uveze ukuba umcimbi lo udluliselwe phambili ngoba kuviki ephelileyo bekulemicimbi eminengi yezamasiko.
“Sibone kufanele siwudlulisele phambili umcimbi lo wenziwe ngoNcwabakazi ngoba kuviki edluleyo bekulemicimbi eminengi eyezamasiko.
“Umcimbi lo sesikhethe ukuthi wenziwe ngenyanga kaNcwabakazi ilanga lakhona sizalazisa uzulu.
Okunye okusenze sawudlulisela phambili umcimbi lo yikuthi abafundi bezikolo bacele ukuthi wenziwe ngesikhathi sekhefu ngoba labo befuna ukuphatheka emcimbini lo wokutayila,” kutsho uDube.
UDube uphinde waveza ukuthi zonke iziqabhobho elizweni ezifisa ukuphatheka kulumcimbi zikhululekile.
“Zonke iziqabhobho elizweni ezilesifiso ukuphatheka kulumcimbi kazikhululeke, zibuye zizongena emcimbini lo, zingabuya zizobhalisa,” kuphetha uDube.
