uMthunywa
SOKUKANENGI sisizwa ngamadoda atshiswa ngamafutha ngomkabo kubangwa omakhwapheni abayabe sebeqede umholo wonke wendoda imuli yona isidla ingqweqwe zomlomo.
Le yinto eyenzakala mihla yonke, akula kuthula kweminye imizi ngenxa yamanye amanina angela nhliziyo kodwa afuna ukuchitha imizi yabanye kulokuthi labo bazidingele ezabo izithandwa bakhe eyabo imizi. Ngumfazi onjani kambe olesibindi sokuchitha umuzi womunye umfazi?
Minengi imizi edilikeleyo ngenxa yabomakhwapheni, indoda ivele ikhohlwe ngemuli yayo imali yonke singeyokulungisa inwele lenzipho zikamakhwapheni, umuntu eziyenga esithi umakhwapheni ungiphethe kuhle ukudlula umkami. Yebo uzakuphatha kuhle, ungadli lutho olubabayo ngaphandle kwebilebile ozifakele lona ngoba kukhona akufuna kuwe, uzakumunya njengomkhaza akuqede du adlulele phambili wena umuzi sudilikile.
Lawe mama ozazi ukuthi ungumakhwapheni lidimoni bani olalo? Abanye ngabathandana lamadoda abantu bekwazi ukuthi balemizi, uyabe usithi wenzani kambe nxa sucitha umuzi womunye umfazi? Abesephelile kambe yini amadoda emhlabeni wonke uze uyeqoma umnikazi womuntu ukwazi. Abanye vele umuntu lenhliziyo ayikho, loba sezwile ukuthi umuntu athandana laye uthethe uyaqhubeka kuphela aze abe lesibindi sokukhuluma lonkosikazi aze athi umkakho lamuhla ungapha kimi, ungazihluphi ngizamgcina. Yikho ohle ubone khona ukuthi umuntu lobuntu abukho sibili ulengqondo zokubhidliza kuphela.
Yikho okuvela khona-ke lapho othola umakwapheni setshaywe waze wayavukela esibhedlela ngumama womuzi, sebengasolwa bona omama ngokusebenzisa udlame kodwa hatshi okunye liyazenzela, lani lizibambe. Abanye ngabayabe sebebhoda ngezinyanga ulunyoka soluthe nama suthole umuntu okhiyiweyo ngento zokuganga.
Lani bomama, ezindlini lapha gcinani kuhle obaba ezindlini, ziphathe njengalapho esakubona useseyintombi.
Ungathi ngoba sekuthethe uthi sokwanele ngisazihluphelani ngokugeza lokuzicomba, bayahluthuna omakhwapheni usale ubambe isisila sejuba.
Lingakhohlwa bomakhwapheni, indlela okhipha ngayo omunye umfazi emzini wakhe yiyo lawe indlela ozaphuma ngayo.
