uMthunywa
OMUNYE lomunye uyinkosi emsebenzini wakhe. Umuntu angabe efundile kumbe engafundanga kodwa nxa eselapho asebenza khona, uba yinkosi. Nxa udinga uncedo kufanele ukhulume ngokuzithoba ukuze uthole yiloba yiluphi uncedo oludingayo.
Kumnandi ukuyadinga uncedo kumbe ukubuza udingisisa ngolutho oluthile uthole isiphatho esihle. Kodwa-ke kubuhlungu kakhulukazi ukubanjwa ngomunwe uze uvuke ulaka nxa ungumuntu olenhliziyo encane.
Kube kanti kuvele akudingakali ukuba umuntu aphendulele eceleni kumbe eyise obuzayo ngoba ethembe ukuthi usemsebenzini wakhe ulamandla ngoba engasoze athole konke akudingayo emsebenzini wakhe kuphela, kuzadingakala ukuba aye emsebenzini womunye lapho azathola habe! angathi ngumuntu ake wamumbuluzela.
Abantu asebekhulile yibo abandise ukuthola isiphatho esibi nxa besuke bangena enkampanini yalabo abazithi bafundile.
“Hello, can l help you? Pardon,” lapha-ke siyabe siphuma ngamakhala isikhiwa kufuna umuntu osaziyo laye njalo kufuna elalele okuzwayo.
Uhlupho lusuka lube ngolokuthi ogogo labokhulu ngitsho labazali bethu abanengi, bayabe bengazwisisi nxa sekukhulunywa kanje bayabe bengasezwa sebephongukunqekuza amakhanda phela.
Amafomu abayabe bemele bawabhalabhale bayabe bewabuzwe ngesilungu okusuka kubenzima kibo ukuthi bayebuza abasebenza lapha ngoba besazi ukuthi abasoze bathole uncedo.
Ubona umuntu esebunisa ubuso ebutshwabhanisa ngendlela ethi waze wangiqedela isikhathi wena gogo kumbe wena khulu.
Kuyadanisa lokhu, kwenza abanye abantu bakhanye bezinyamazana zendle ezifuna ukubulalana zidlane inyama.
Emtshoveni njalo sekukanengi abantu bekhala ngesiphatho esibi. Kambe imali ingathethisisa umuntu umuzwe umncedisi kamtshayeli, uwindi phela, esephoxa umuntu omnika imali ngoba emqhubele i$100.
“Ngicela unginike imali engcono masalu ufuna ngiyenzeni i$100, kanti uyangihlolela?”
Iwayilesi le iyabe isitshaya idabula indlebe ikakhulu labo abayabe behlalele emuva bayabe bengasezwa ngitsho lakancane.
Uke uwuvule umlomo nje ucela ukubana yehliswe uyabe uzithelile lapho lomtshayeli uyaphosa amabili amathathu amagama.
Ube usuzibuza ukuthi kanti isiphatho esibi sivele ngesani nanku phela sonke singabantu banye abazama ukuphila.
Asikholwa thina ukuthi kulomuntu othanda ukuthethiswa empilweni ikakhulu nxa kungela ngitsho cala alidalileyo.
Kuhle kakhulu ukuba abantu bathandane benzelane lokhu abayabe befuna ukukwenzelwa labo. Nxa yena ebusa emsebenzini wakhe lami ngibusa kowami sizinkosi sonke kuhle siphathane kuhle ngoba sizahlangana omunye edinga uncedo komunye.
