uMthunywa
UDLAKELA esilubona siphinde sizwe ngalo kulezinsuku luyadanisa.
Nsuku zonke sifunda ngendaba zodlakela olusemphakathini okuyinto ehlisa isithunzi sethu njengabantu bakaMthwakazi.
Ngempela abantu sebalahla amasiko, akusela owesaba ukuchitha igazi kumbe nje ukuphosa inqindi kumakhelwane wakhe. Izolo besisazi ukuthi izandla ziyagezana kukanti ikhotha eyikhothayo.
Okwalezinsuku sekusethusa nanko phela uzulu usephenduke inyamazana ngoba kumane nje kuhlaselwane kungabi ndaba zalutho.
IBhayibhili liyakhuluma ukuthi ngensuku zokucina izizwe zizavukelana kodwa lokhu osokusenzakala sokudlulisile. Phela abantu kulezinsuku kabasaphathani njengabantu, sebephenduke inyamazana. Kusa kwamalanga sokuhlala kungezibuhlungu kuphela abantu bebulalana.
Ukubusa lokudela okwakubonwa ngokhokho kasisakwazi, sesikukhanuka. Uze ukhumbule ukuthi mhlawumbe kwakuvele kunjalo endulo kodwa nje kubuye kuzicacele ukuthi ngamalimi ezansi la ngoba okhokho babelesihelo.
Ungananzelela kulezinsuku uyezwa kuthiwa umuntu ubulele omunye kubangwa into encane kakhulu. Abanye njalo ngasebaphenduka izigelekeqe ezihlala egangeni zisebenza ukutshontshela abantu lokubabulala.
Kukhona njalo ababulala abantu befuna izitho zomzimba okuyinto emangalisayo kakhulu. Phela kulezinsuku sebebanengi abantu othola kuthiwa batholakale befile kodwa bengelazitho zomzimba ezeneleyo. Kambe yibuntu bani bonobu?
Loba nje abadala bethi awukho ongathunqi intuthu njalo umsizi ngowembiza zonke kodwa babengatsho ukuthi abantu bavuke ubuganyana baqale ubudlwangudlwangu.
Kukhona njalo abanye abathwalise nzima abanye ngokudlwengula. Uzwa kuthiwa inkalakatha yendoda ibhinye umntwana omncane okumangalisayo yamthelela imikhuhlane eyalezinsuku, umuntu nxa eyakwenza isihluku esinjalo angithi uyabe sephenduke umbulali. Yilo-ke udlame lolu olungafunekiyo kuzulu ngoba luyabhidliza, kalwakhi.
Okumangalisayo yikuthi abanikazi bodlame lolu sebabusa ngaphi ubuntu ngoba phela odaleke ngobuqotho angazake enze into efana lale.
Abantu basuka babuswe yimimoya bazimisele ukubulala bethi badinga imali kodwa qaphela zulu ukuthi igazi lomuntu liyakhuluma.
Ngalokhu kuhle ukuthi umuntu azisebenzele hatshi ukubulala ethi ufuna imali.
Abanye njalo ngabahlukuluza abantwana abangelabazali, uthole umntwana ehlala ehlulukelwe okuzwisa usizi. Isimanga yikuthi ngangizwe abadala bethi abesifazane balesihelo kodwa esikhathini esinengi yibo okuvame ukuthi bahlukuluze abantwana abangelabazali.
Abantwana abahlutshwayo kuvame ukuthi bacine besuka ekhaya bayehlala ezitaladeni. Esikhathini esinengi abantwana laba yibo abacina sebevukela abantu nxa sebekhulile bababambe inkunzi kumbe baphile ngokubulala. Lokhu kudalwa yikuthi umntwana uyabe ekhule ephila nzima okuyikho okudala ukuthi angabi lesihelo.
Kambe uzasithatha ngaphi isihelo yena engakwazi ukuthi ukhona olesihelo njengoba uyabe waluswela uthando lwabazali bakhe.
Lokhu kusifundisa isifundo sokuthi siphathane kuhle empilweni ngoba abanye abantu abahlukuluza abantwana babaleke bacina besifa kumbe belinyazwa ngabantwana laba bebabamba inkunzi sebekhulile. Asiphileni ngokuthula silwisane lodlame bakwethu.
