uMthunywa
MAHLABEZULU amuhle njengoba nje sesedlule isikhathi esasisilindele sonke sokuthi sikhethe abakhokheli abathandwa yithi ngokubavotela asigcineni ukuthula obekukhona.
Sonke ilanga lokuvota lalisiphuzela kodwa sabekezela saze salifica sigcine ukuthula kwethu. Omunye lomunye uhamba egcine umuntu wakhe amthandayo enhliziyweni yakhe loba eyabe ekuthembisile ukuthi uzafaka othandwa nguwe.
Ezinye impumela zokuvota sezethulwe ngabeZimbabwe Electoral Commission kukanti ezinye lokhu zisachwayisiswa. Labo osokuvele ukuthi bazamela uzulu kukhansili kanye lakuphalamende sokusalele bona ukuthi njengoba sebekhethiwe ngabantu labo bafeze izithembiso abazipha umphakathi.
Ukuqalisa ukubandlulula abantu ngeke kuphathise ilizwe lethu kodwa kudingeka ukuba sibe yimbumba sisebenze ndawonye ukuze ilizwe lethu lithuthuke libuyele njalo libe ngumgogodla waseAfrika.
Ngokufanayo labo abanqotshiweyo labo kudingeka ukuba bamukele impumela zokhetho ngoba abantu sebekhethile abakhokheli abafunwa yibo akusetshenzwe umkhonomi welizwe uthuthuke.
Bakithi singangwenwa ngumoya wangaphandle, thina amaZimbabwe singabantu abathandanayo njalo abaphila ngokuthula ngoba silobuntu. Mahlabezulu, akula lapho esingaya khona nxa singaphila sidonselana ngoba ukubambana yinkalakatha.
Okunye njalo okugcina ukuthula lakusasa yikuthi labo abanqobileyo bagcine izithembiso zabo. Emavikini edluleyo bekungahlaleki ezindlini zethu kulomsindo walaba abafuna ukuvotelwa behamba bebabaza ngobuhle abazakwenza bengangena esihlalweni.
Njengoba nje belikhankasa kangaka bakhokheli ngomsebenzi elizawenzela abantu sicela ukuthi libambe izithembiso zenu ukwenzela ukuthi kusasa kungabi lomvukela ezacina iphambanisa ukuthula kwethu.
Kusebenzeke kuhle kakhulu kwaze kwayavotwa ngakho asingatshelelwa eceleni Mthwakazi omuhle sigcine ukuthula kwethu ngoba esikhathini esinengi kuvame ukuthi lowo othuma abantu ukuthi benze ububi yena uyabe ephephile kulimala lina abancane.
Ungadubekisi imuli yakho uphinde ubulale ikusasa labantwabakho ngezinto ezingekhoyo, gcina ukuthula olakho, konke kuzahamba ngendlela. Ngilethemba lokuthi sizaqhubeka siphila kuhle eZimbabwe yethu enhle.
