uMthunywa
SEKUKANENGI sisizwa indaba zabondofa abakhathazayo ezigabeni kunye lemalokitshini atshiyeneyo elizweni lakithi. Abanye sekuke kwazanywa lokuthi baxotshwe kukanti njalo abanye lanamhlanje lokhu bezenzela umathanda kulezondawo.
Kulezinye indawo ezaziwayo ukuthi akuqunywa kizo kungavele kuhlwe ngoba kusesatshwa bona abafana abafitshane. Kwezinye indawo lezikolo azilababalisi ngoba engekho ofuna ukuyakwenziwa umfazi noma indoda yisilo.
Kuviki edluleyo, uMthunywa ubequkethe udaba lwabondofa abahluphayo elokitshini leNkulumane koBulawayo .
Okuzwisa ubuhlungu kakhulu yikuthi izituhwane lezo akwaziwa ukuthi ngezikabani ngakho sezitshaya abantu abazedlulelayo ilanga libalele.
Umuntu uyabe eyedwa esiyadinga inotho kanti futhi ngesikhathi ondofa labo sebemhlupha uyabe esefuna abantu bemncedise.
Abanye nxa sekubheda bathatha ondofa babo bayebagcina ezikolo kanye lasemakilinika kuzithaphuzele emacansini. Kambe abantu isibindi sokuthatha umntanomunye umuntu bamuphe undofa ukuthi abengumkakhe basithatha ngaphi. Labo abenza lokho bangavuma nxa into efanayo ingenziwa kwababo abantwana?
Ondofa laba abaseNkulumane lokhe beqhubekela phambili lanxa kukekwadingwa inyanga labotsikamtanda ukuba zizobakhupha.Okudanisayo yikuthi ondofa laba babulala impahla yabantu nanko phela babulele amafasitela ezindlu zabantu babuya bajikijela lezimota ezihamba emgwaqweni.
Kungumbono woMthunywa ukuthi elizweni lonke jikelele abantu abaziwayo ukuthi balabondofa bangavunyelwa ukuthi bahlale emphakathi nanko phela ondofa babo bacina behlasela abantu abangazi lutho kanye labantwana.
Okhansila,izinduna kunye laboSobhuku kumele babone ukuba bonke abakhunkuli ezabelweni zabo bathathiswa unyawo ngoba abantu abagangileyo abawusizi ngalutho umphakathi kuphela babulala isizwe ngoba ondofa babo betshontsha, bedlova kanti phezu kwakho konke bayabulala. Pho abantu abafuye izitha zabantu bayabe begcinelwani emphakathini? Kabakhonjwe indlela sibili ukwenzela ukuba kube lokuthula emphakathini.
Okunye njalo abaphathi bezigaba labo kumele badinge inyanga kumbe abafundisi abalamandla bezokhupha izituhwane lezi ngoba esikhathini esinengi abantu bavame ukudliwa izimali ezinengi ngabaphurofethi laba abathi bayenelisa ukukhipha ondofa bona besenzela ukuzidlela imali.
