uMthunywa
KUYADANISA ukunanzelela ukuba ubunzima bempilo elizweni sebuguqule inengi labantu lakhetha ukuphila ngendlela ezingalunganga ezifana lokutshontsha kunye lobufebe.
Yebo kudala bekuyinto emangalisayo njalo bekuthiwa okwenzakeleyo kuyakuhlolela uma umuntu wesifazane ekutshontshele impahla yakho.
Kodwa lamhla izinto sezaguquka inani labomama elitshontshayo selifana lelabobaba uma lingedluli. Yebo kunjalo, kambe singakuthini. Sekukanengi sifunda kumaphephandaba ngomama laba ababizwa ngokuthi ngomarobani ngoba phela begqiba impahla etshontshiweyo ezigqokweni abazigqokileyo.
Sibona kuqakathekile ukuthi abantu bazilimukise kulezizikliwi ukuze bangakhali kusasa.
Akumelanga umuntu athembe omunye umuntu angamaziyo ngitsho khona ukuthemba isihlobo sakho ngoba inengi lazo ziyabe sezidonselana emthethwandaba zisethesana amacala atshiyeneyo.
Asitsho ukuthi abantu sekumele baqume ubuhlobo babo cha, kodwa-ke sekumele bahlale beqaphele nanku phela iphephandaba likazulu phose maviki wonke liyabe limumethe udaba lukamalume obambe umzukulu iganyavu kumbe ugogo olimaze umzukulu.
Inengi labantu lisuka liphaphame sekwenzakale umonakalo kukanti bebelakho ukuwuvikela lula nje.
Ezitaladeni edolobheni uthola omama kunye labobaba bebingelela abantu abadlulayo bebuza ukuthi “usiphatheleni sisi”.
Nxa ungabakhangela ebusweni yebo bakhanya belungile bengelacala kukanti lokhu akutsho ukuba abasimasela.
Ngitsho lomuntu okubobothekelayo ekubuka impahla yakho oyigqokileyo, into yakuqala omele uzibuze yona yikuba ufunani kuwe.
Ngesikhathi lesi ephethe ekubuka omunye isandla siyabe singena esikhwameni, uzathi uphaphama uhlaba umkhosi bayabe sebenyamalele.
Abanye bayakhuluma kuhle lawe uze ubone ukuthi kambe ungabe usesabani nanku phela ngabazalwane elingena ibandla elifanayo loba nje lingenela endaweni ezitshiyeneyo. Ngokubobotheka okukhulu usumnxusa endlini yakho kumbe njalo usumeboleka umakhalekhukhwini kanti uzasala usiqhinqa isililo.
Kuhle yebo ukuthi abantu bethembane kodwa ke ngobunzima impilo osebabayibo inengi labantu bakithi selaguquka laba yizilo.
Kunganceda kakhulu ukuthi uma ufuna ukuthengiselana impahla lomuntu kumbe njalo ukwebolekana liqale litshintshane inombolo ezithile, ezinjengezesithupha, ezephasipoti ngoba ngokwenza njalo uleqiniso lokuba anganyamalala amapholisa alakho ukumdinga aze amthole.
Ukwazi igama lomuntu nje lesibongo sakhe akusenelanga kulezi insuku, nanku phela awusoze ubelalo iqiniso lokuthi igama akunike lona ngeleqiniso kumbe hatshi. Kuhle ukuthi sikhaliphe ngoba kusasa kungaba yithi.
Yizikliwi lezi esithanda zibulawe kumbe zivalelwe ejele okwempilo yazo yonke, njalo lezi akusizo zodwa izigebengu esikhulumisana lazo lapha esihamba khona. Ngenxa yalokhu kunzima ukuba sethembe wonke umuntu esihlangana laye.
Ukuze njalo abantu bazame ukuzivikela kuhle bahlale belenombolo zezihlobo zabo kunye lezamapholisa.
Lokhu kuyaphathisa kakhulu ukuthi nxa behlelwe ludubo ubani lobani osendlini uyazi ukuthi endaweni ethile kulogwalo olulotshwe inombolo zesibhedlela, ezamapholisa kumbe ezesihlobo esiseduzane.
Abantu kumele njalo bahlale bekhuluma labomakhelwane ukuze benelise ukuncedana uma omunye wabo ehlelwe yingozi. Akuncedi ukuthi abantu abahlaliseneyo babe yingwe lenja nanku phela akulamvuzo ngitsho onikezwa abantu abazondanayo.
