uMthunywa
SIZWE sikaMthwakazi laphila ngezinyembezi legazi kulenzinsuku kutheni? Kungeneni esizweni esasidume ngokuthula lokubambana? Yiphi le impukane esiwone loluchango olunguMthwakazi? Osephose imbewu yobunke lobu koMthwakazi ngubani?
Bakwethu sikukhangele sonke ukuthi sebephelile abantu ngenxa yobudlwangudlwangu osobulapha.
Ababulali babuzwa lapha, amasela abuzwa lapha, abadlovayo babuzwa lapha njalo, kanye labakhunkuli sebebuzwa khonapha. Awu, kungani kambe sivumela ububi busanda lapha koMthwakazi?
Abantwana bakhathesi umuntu bambona njengesibungu ongasicobodisa kungabi ndaba zalutho.
Njengemadolobheni khona angikhulumi, kukompunzi idla emini. Kambe ngumoya bani osuwembese abantu bakithi.
Yebo izikhathi zinzima kodwa lingavukelani yazini ukuthi wonke umuntu uyakufuna ukuphila kakho ofuna ukufa. Ngakho masela ake liphumuze abantu labo badobhe kholokho okulutshwana baziphilise lezimuli zabo. Sebenzani okwenu litshiye ukuvukela abantu libabulala libathathela abakusebenzeleyo. Kanti kungani lifuna ukudla mahala njengamadlozi? Kaliboni yini ukuthi lingcolisa uMthwakazi ngobubi benu?
Bakwethu ukuqedana lokhu akutsho ukubhukudana libulalane kuphela kodwa ngitsho lokuyengana kwabontanga baze bangenisane ebubini. Qaphela ke muntu omutsha ngoba lokho kungacina kukwenza uzibulale ngoba usunindwe igcikwane lengculazi.
Kungumbono waleliphephandaba ukuba aluba singaxwaya ububi phakathi kukaMthwakazi isizwe sethu singaphinda sithuthuke kwezomkhonomi.
Kuyadanisa njalo ukuthi ubukhunkuli labo bukhanya buqhubekela phambili ngobubi babo. Uthola kuthiwa umuntu utshaywe ngondofa kumbe indawo ethile ihlaselwa ngondofa. Kuviki ephelileyo iphephandaba likazulu belimumethe udaba lwabondofa okubikwa sebethwalise nzima izakhamizi zePumula South ngokutshaya izindlu zazo ngamatshe.
Kukanti njalo kolunye udaba kwavela ukuba izigulane kanye labomama abalindele ukubeletha eSt Paul’s eLupane sebethwele nzima ngondofa ababahlukuluzayo. Kambe ngumoya bani lo owenza umuntu aze angabi lomzwangedwa akhethe ukuhlukuluza abantu abavele bephathekile emzimbeni yabo.
Kungumbono waleliphephandaba ukuba abantu bakithi kasifundeni ukuzisebenzela ngezandla zethu siphumelele sisazi ukuba yizithukuthuku zethu hatshi ukuphumelela ngoba ususebenzisa ondofa abathi nxa ungasabafuni subalahlela iganga usufuna bahambe behlukuluza abantu abamsulwa.
BakaMthwakazi, ake sifunde ukuzwelana siphathane ngomusa njengokwakusenziwa ngokhokho. Asekeleni ukubulalana. Asivuseleleni ubuntu bethu bakwethu sidele ububi lobunke lobu esesibuvuka sibe munye.
