uMthunywa
UMSEBENZI kasobhuku ngowokukhangela ukuthi izinto zihamba kuhle esigabeni. Usobhuku owazi umsebenzi wakhe ukhangelelwe ukuthi abone ukuthi kulokuthula esigabeni, amasiko ayagcinwa lokuthi abantu bayahloniphana.
Usobhuku ukhethwa ngabantu njalo ukuba khona kwakhe esikhundleni kutsho ukuba abantu bayamthanda.
Ukhethwa ngabantu ngenxa yokuthi ngumuntu wabantu.
Kodwa kulabanye osobhuku abangayisibo.
UMthunywa ukholwa ukuthi osobhuku bakulezinsuku bayadelela. Badelela umphakathi ngoba yibo abasuka bephule imithetho.
Pho kuthiwani nxa usobhuku esegila imkhuba? Ziphuma ziphihlika indaba ngokuthi usobhuku usetshaye esinye isakhamuzi kubangwa utshwala kumbe umhlabathi.
Abanye ngabatshontsha inkomo zezinye izakhamizi kuthi abanye njalo bathathe abafazi babanye. Umuntu owenza kanje akumelanga abelesikhundla. Loba kuyisikhundla esinganani, isiphathamandla esilitshapha kasimiswe umsebenzi.
Kumaviki ambalwa adluleyo iphephandaba leli like lamumatha udaba lwabosobhuku beNyathi abatshontsha inkomo zesinye isakhamuzi bazabelana lezinye izakhamizi.
Lokhu kayisikho ngitsho ukuziphatha okukhangelelwe emuntwini ongumkhokheli. Yikho esikhalaza ngakho, kambe ngabakhokheli bani esilabo kulezinsuku abephula umthetho. Bafundiseni abantu ababakhokhelayo ngoba phela bona bayabe bekhangelelwe ukuthi babajezise lapho abephula khona umthetho.
Osobhuku bethu inhlonipho abaselayo, asazi ukuthi bayilahlela kuwuphi umango.
Mhlawumbe kumele sisole zona izakhamizi lenkokheli zesigaba okuyizo ezekela ukukhuza osobhuku.
Isimilo somuntu siyabonakala lanxa engakagcotshwa.
Nxa osobhuku bethu sebephenduka besibangamatshapha angahloniphi imizi yamanye amadoda kutsho ukuthi akusela zigaba ezilenhlonipho phela.
UMthunywa uyabuza ukuthi kuthiweni ngosobhuku laba. Abanye bazakuthi siyabahlolela osobhuku ikanti yibo abahlolela isizwe.
Umbuzo omqoka ngothi, bazakhuzwa ngubani osobhuku nxa besehluleka ukulandela umthetho?
Ngokwanda kwamacala abo ezigabeni lakho, kutshengisa ukuthi akulamuntu olamandla lesibindi sokukhuza usobhuku.
Induna zethu mhlawumbe kazikuboni okwenzakala ezigabeni. Sekubusa bona osobhuku abangahloniphiyo. Induna sekungathi azikho.
Kungumbono waleliphephandaba ukuthi induna kumele zivuse inkophe zikhuze abantu abaseduzane lazo ngoba yibo abaphambanisa izakhamizi zicine zingasahloniphi ubukhokheli obuphakathi kwabo.
Kuzo zonke izigaba uMthunywa uhlala etshelwa ngosobhuku laba. Kusuka kube sobala ukuthi sebezenzela umathanda.
Umkhokheli ngowabantu ngakho kumele ahloniphe labobantu abakhokhelayo ukuze labo bamhloniphe, inhlelo ziqhutshwe ngendlela okumele ziqhutshwe ngayo ezigabeni. Ukuhloniphana kuqakathekile ukuze abantu bahlalisane kuhle.
