uMthunywa
KUBUHLUNGU ukuthi ngalesi isikhathi kukhona abantu abaphila nzima ngenxa yokuthi kukhona izinto ezidingekayo empilweni abangelazo.
Yebo kambe kunzima ukuthi umuntu angathola yonke into ayifunayo empilweni kodwa kukhona ezinye izinto okungamelanga ziswelakale.
Izinto ezifana lezikolo lezibhedlela ziyimfanelo yomuntu wonke kungakhathalekile ukuthi ukuwuphi umhlubulo welizwe.
Logatsha olubona ngenhlalakahle yabantu umhlaba wonke jikelele luyatsho ukuthi kumele abantu bathole ukwelatshwa nxa begula okutsho ukuthi kumele izibhedlela lamakilinika kubekhona.
Luyatsho njalo ukuthi imfundo lilungelo lomntwana wonke emhlabeni.
Sesisiza khonapha kwelakithi, abaphathi bezemfundo bahlala bekhuluma phose kuyo yonke imihlangano eyabe ilabantwana labazali ukuthi abantwana akumelanga bahambe imango emide besiya esikolo.
Abantu lezinsuku impilo abayiphilayo izwisa ubuhlungu ngoba osomabhizimusi sebesenza umathanda.
Labo abagulayo bathi bangabhalelwa imithi bathi befika lapho okuthengiswa khona imithi batshelwe ukuba ngeke bayithenge ngama-bond notes kodwa kumele babe lemali yeMelika.
Kukanengi uHulumende ebikela uzulu kanye labamabhizimusi ukuthi imali le esetshenziswayo iyalingana leyeMelika kodwa osomabhizimusi basuka bephulele izigodo endlebeni bangakutshayi indiva lokhu.
Kambe kulungile na ukuthi abantu bafe belazo imali emabhanga ngoba abathengisa imithi bethi bafuna imali yeMelika?
Abantu lenyamazana kutshiyene kakhulu, umuntu kumele amalungelo akhe ahlonitshwe ngazo zonke izikhathi.
Kube yikudla lakho abanini bezitolo bazenzela umathanda.
Bafaka intengo yokudla lokunye okwehlukeneyo bekhangele eceleni bengazihluphi ngitsho lokuthi bazibuze ukuba abantu imali abayiholayo iyenela ukuthenga lokho kudla.
Lezinsuku abantu bababaza bangaqedi ezitolo sebetshelwa intengo eseziphindwe kasikhombisa zempahla etshiyeneyo.
Kakho ngitsho loyedwa ongathi kakwazi ukuba isimo selizwe lethu sibi kodwa lokhu osokusenzakala akudingeki ngitsho.
Yimisebenzi yabantu abafuna ukubisela emuva intuthuko yelizwe lethu nje kuphela le.
Sicela impendulo, bosomabhizimusi lingenwe yisibungu bani selicabanga nje ngokwenza imali ngendlela enje?
Sitshayela uHulumende ihlombe ngemizamo yakhe yokukhulumisana labosomabhizimusi ukuthi behlise intengo yempahla etshiyeneyo esikhweziwe.
Intengo yenhlanyelo, umvundiso kanye lamafutha ezimota besekukhweziwe kodwa uHulumende uthethe inyathelo ukuze lokhu kulungisiswe.
Siyakubonga ukuba labakhokheli abalabantu enhliziyweni zabo.
Sicela njalo ngokufanayo uHulumende akhulumisane labathengisa imithi ukuze labo abalezifo ezehlukeneyo bangafi ngoba bengelawo lawo madola afunekayo ukuze bathenge imithi.
