uMthunywa
KULEZINSUKU sokuyimvama ukuzwa indaba ezitshiyeneyo ngabantu ababulalana kumbe ukulimazana ngenxa yokungathembeki kwabomkabo.
Akusamangalisi ukuzwa kuthiwa usekazibani uledlalicatsha, umakhwapheni phela. Kambe kungabe kubangelwa yini lokhu abantu besazi ukuthi kulakho ukuchitha imizi kuphinde kubangele ukumemetheka komkhuhlane wengculazi?
Banengi omama abakhala ngokuthi obaba abasahlali ezindlini, sebengabahlala bekumadlecatsha la okukhanya azimisele ukwehlukanisa imideni.
Mihla lemihla sibala kumaphephandaba ngabathetheneyo abalwa uthole abantu behlubulana izidwaba emphakathini sekuyisimaye maye kubangelwa yikuthi umfazi uyabe esethole imilayezo engalunganga kumakhalekhukhwini kababa.
Abantwana kuhle kube yikuqala kwempilo enzima nanku phela umuzi uyatshabalala basale bengasela owokubagcina.
Abantu basuka bakhohlwe ukuthi imali ingeke yathatha indawo yothando kumbe njalo ibe yincwadi ebavumela ukufeba.
Uzwa abantu nxa sebesemthethwandaba besithi “mina ngangivele ngingasamfuni uzibani ngangisithi khona ngizamtshela’’. Konke lokhu akulunganga. Abantu nxa betshada kumbe njalo bezibika ebadaleni lasezihlotsheni zabo kungenxa yokuthi basethandweni.
Pho okusuka kuthanyele lolo thando babone angathi bayizitha bengabe besafuna lokukhangelana kuyini?
Abantu kumele bazi ukuthi uthando lukhula ngokwazana, nxa umuntu ezatshiya inina lakhe elanda i-small house ethi uyithanda ukwedlula umama ombelethele abantwana uyazikhohlisa ngoba iqiniso elikhona yikuba i-small house ayimazi, yazi imali yakhe.
Nxa engaphiwa inyanga ukuthi ahlale lalo lelodlalicatsha uzalikhumbula inina lakhe alithwalise imitshaqana nanku phela uzakunanzelela ukuthi uthando akusimanamnede kuphela. Kuhle abantu bakhulumisane ukuze kungabi lokungezwani okuzakwenza bangahlalisani kuhle.
Nxa abantu bekhulumisana bezwana endlini akwenzeki ukuthi umuntu afebe ngoba bezwisisana.
Kodwa-ke nxa abantu bengakhulumisani, bephilisana angathi bahlangane ebhasini basebehlalisana nje akubi nsuku zatshwala omunye wabo kumbe njalo bonke bengangenanga indlela embi yokufeba.
Lokhu kuyingozi hatshi kulabo abafebayo kuphela kodwa kumuli yonke ngoba igcikwane lizabathanyela litshiye abantwana bezintandane.
Umama kumbe ubaba ulakho ukuziphatha enze konke okudingakalayo endlini kodwa ngenxa yokuthi omunye ngoba uyabe efeba igcikwane lizamemetheka abantwana basale bengela owokubagcina, okuyinto ebuhlungu.
Kanti njalo omunye umbuzo abantu okumele bazibuze wona ikakhulu amadlecatsha, yikuthi kuyabe sekutheni umuntu echitha umuzi womunye nje?
Banengi phela abantu abangathathanga labangathathwanga kodwa ubona umuntu esiya lapho azi khona ukuthi sekwakhiwe.
Yebo ulakho ukuzitshela ukuthi lokhu akwenzayo akusoze kwaphumela egcekeni kodwa-ke bathi bona abadala okulempondo akufihlwa emgodleni.
Imuli elabazali abathembekileyo abahlalisane ngothando yondla abantwana abalezimilo ezithabisayo, abantwana abakhula bethandana njalo besenza into ezizakwenza baphumelele empilweni.
Kodwa indlu elenzondano lokungathembeki yandise ukondla abantwana abathi besakubanga laphansi bazithwale, baqale ukutshontsha lokwenza bonke ububi obuyabe bungakhangelelwanga.
Nxa abantu bengasoze baguqule indlela abaphila ngayo eyokufeba imizamo yokuqeda igcikwane lengculazi liyize njalo inani labantwana abazintandane abasezitaladeni lizakuya likhula.
