uMthunywa
ZINENGI izigigaba ezihlasimulisa igazi ezenziwa ngosomabhizimusi labanye abathengisayo ukuze izinto zabo zithengwe, okunye umuntu usuka azibuze ukuthi kambe liqiniso sibili umuntu sengenza into enjalo? Asazi, kunzima okwenzakala lapha phandle, yikufuna imali konke lokhu, kodwa nxa kuliqiniso lokhu abantu kababe lenhliziyo hatshi ukudlisa abantu ingcekeza, okunye ukudla okuthengiswa lapha ezitaladeni umuntu angakudla uyatshona ulele ngesisu esambuzini.
Njengoba lisadliwa nje ihlobo sitshayisana labo abathengisa indlubu, umumbu lokunye okuphekiweyo okuyabe kukhudumala. Inengi lihle likweqele phela sokulokungumqando kulezinsuku kufuneka ezikhudumalayo ezifela emlonyeni.
Okubuhlungu bantu abathengisayo uzathola umumbu sulamalanga amathathu uphekiwe ulokhu ukhudunyezwa kuphela suze wonakala, awucabangi ngomunye umuntu njani ukuthi uzaguliswa yikudla kwakho? Yebo khona uyabe sulahlekelwe nxa sekonakele kodwa ngubani okumele adle ingcekeza?
Abanye njengoba bethengisa ngokungekho emthethweni ukudla lokhu njengerenkini khonale ukudla kwakhona kufihlwa ezambuzini, ukudla esambuzini sibili, phela lawe mthengi uthi sudle ukudla okunjalo uzayizwa intwabe yakhona, uphosa lokufa. Kube lalaba abathengisa imibhida hatshi bakithi, inditshi uyabe uyibona ukuthi le yayingeyokugezela sibili umuntu wazithathela wafaka imibhida yakhe wayathengisa.
Abantu kabahlanzeke bakithi, kuyathengwa njani ukudla kwakho nxa kungakhangeleki? Yikho-ke lapho omunye ubona engathengelwa seqala imininingwane esiyizwayo lapha kumbe liqiniso yini, asazi.
Uzwe sokuthiwa uNazibani nxa epheka umumbu wakhe ufaka isikhindi ngaphansi apheke konke ukuze kuthengwe, abanye omama kuthiwa bachela abakuthengisayo ngamanzi abageze ngawo ngaphansi. Nxa kuyikho elikwenzayo bathengisi hatshi akelicabangele abanye abantu. Wena kunguwe ungezwa njani udliswa ingcekeza enjalo.
Akube ngabantu abazixoxelayo nje ukuthi yinto elizenzayo lezo ngoba nxa kuliqiniso sibili kuyikho elikwenzayo lizikhuze, isiqokoqela yikuhlanzeka ukuthi ibhizimusi ihambe, hatshi imithi. Asikhulumi-ke ngabosomabhizimusi abalezitolo bona abatholakala belamakhanda lezitho zabantu! Labo hatshi okwabo kuphambili, sebephambene amakhanda.
