uMthunywa
SOKWANDILE elizweni lezinsuku ukuthi sizwe ngengozi ezitshiyeneyo ezibulala abantu emigwaqweni. Kuyadanisa ukuthi abantu abanengi bafa ebusuku lemini ngenxa yengozi emigwaqweni ikakhulu le emikhulu okuthiwa ngama-high way.
Kuviki ephelileyo kwenzakale enye ingozi emgwaqweni ophakathi kwakoBulawayo leBeitbridge lapho okutshabalale umphefumulo womuntu oyedwa obehamba ngemota yomhlobo we-Honda Fit. Okudanisayo yikuthi abantu abatshayela imota lezi abanengi yibo ababangela ingozi emgwaqweni.
Ngalokhu thina njengephephandaba likazulu silombuzo ukuthi kanti abomthetho abagcwele imigwaqo yonke le, benzani kusenzakala ingozi? Yibo phela okumele babone ukuthi izimota ezigijima emgwaqweni ziphilile kanye lokuthi abatshayeli labo abahlezi ngemva kwama-steering wheel kabagijimisi izimota ngeziqubu ezingekho emthethweni njalo kabanathi utshwala.
Angithi yikho silamapholisa e-speed trap ayabe esemigwaqweni ethe mpo lomtshina okhangela isiqubu semota okuthiwa ngawe-speed limit. Kuminyaka edluleyo imota le eyamapholisa yayihamba ikhangekhangela emigwaqweni, uzulu waze wayibiza ngokuthi yimot’ etshontsh’ imali ngoba ibathwalise amagabha avuzayo abatshayeli abeqa umthetho.
Pho lamuhla ngengozi lezi ezenzakala emigwaqweni, abomthetho laba sebatshona kuwuphi umgodi?
Phela ezinye ingozi zibangwa yikutshayela umuntu edakiwe. Yikho thina ngezingozi lezi ezenzakala emigwaqweni umlandu siwufaka kwabomthetho ngoba uHulumende wabafaka ngobunengi babo emigwaqweni ukuthi babophe iloba ngubani owephula umthetho.
Siyawasola amanye amapholisa ngokuxegisa umthetho kuzikliwi zabatshayeli abatshayela bedakiwe. Abanye babo bacina bengesabi ngitsho lokuthi bafihle amambodlela abo otshwala lanxa amapholisa ebamisa ngoba bekwazi mhlophe ukuthi amapholisa lezinsuku kasenzi njengakudala.
Kubalulekile ukuthi amapholisa nxa esima kuma-road blocks babe lemitshina yabo le etshengisa ukuthi umuntu unathile njalo unathe okunganani ukuze kuvikelwe ezinye ingozi ezibangelwa ngabantu abatshayela benathile.
Sikhuthaza amapholisa ukuthi akwazi ukuba i-yunifomu yabo ilamandla amangalisayo kungakho kumele bangaze bayekethisa umthetho ukuze ingozi lezi eseziqede abantu emigwaqweni zehle.
Amapholisa siwakhuthaza ukuthi aqinise umthetho emigwaqweni ngoba ukwehla kwenani lezingozi ikakhulu ngesikhathi sekhefu kugxile ekusebenzeni kwabo.
Kungumbono waleliphephandaba ukuthi bonke labo abephula umthetho bajeziswe ukuze bakwazi ukulandela imithetho emgwaqweni njalo senqabele ingozi lezi eseziqede abantu abangela macala.
Labatshayeli labo kumele bangathatheli phansi imithetho yomgwaqo ngoba impilo zabantu abahamba emgwaqweni zisezandleni zabo.
