uMthunywa
ABANTWANA babhadalelwa ngabazali ukuthi baye esikolo kodwa akutsho ukuthi lo sungumlandu wababalisi bodwa ukuthi bafundise abantwana bapase.
Wena mzali umncedisa njani umntanakho ezifundweni zakhe? Uyamkhuthaza na ukuthi asebenze gadalala kumbe uthi lo ngumlandu wababalisi kuphela? Abanye njalo abantu bathi abafundi bakulezi insuku abaselalo ulukuluku lokuthanda ukubala amabhuku. Ukuza kwamafoni lobulembu kubikwa yikho osokuphambanise ukufunda kwabo. Abafundi sebetshona bekubo-Facebook, Twitter leWhatsApp baze bakhohlwe lokutaditsha. Kambe umfundi oyenzenje angapasa esikolo?
Abanye vele betshayisa esikolo sebesiyakuthi nhlo amehlo kumabonakude, ukulalela izingoma kanye lokudlala kuphela. Amabhuku bakhumbula ngawo nxa sebengena esangweni lesikolo. Konke lokhu kwenzakala phambi kwamehlo abazali babo kuthi nxa umfundi esefeyilile, abazali bazonda bagane unwabu baqale ukuvukela ababalisi ubhova, bebagcona ngokuthi kabafundisi.
Ngalokhu kungumlandu womuntu wonke ukuthi basebenzelane ndawonye beyimbumba ukuze abantwana benze kuhle esikolo. Iphutha lokungenzi kuhle kwabo esikolo ngelomuntu wonke. Alikho kubabalisi kumbe kubafundi kuphela.
Kulenkulumo ejwayekileyo kakhulu kunengi eyokuthi “ikhaya vele liyabulala ingqondo” ayisikho lokhu, abazali yibo ababulala abantwana ingqondo ngoba batshonela ukuthuma abantwana ilanga lonke bekhohlwa ukuthi kumele babanike ithuba lokutadisha.
Emaphandleni abanye abafundi abasitholi isikhathi sokutaditsha ngoba njalonje umntwana utshona enikezwa umsebenzi wokwenza ngumzali. Evela esikolo uJabu, kuthiwe adlule aye ekweluseni, uSihle laye kuba yiso leso. Evela esikolo kuthiwe khemani hamba emfuleni uyekukha amanzi ubuye utheze inkuni. Eqeda lapho nguye njalo ozapheka, umntwana alale esediniwe njalo engaselaso isikhathi sokutaditsha. Siyakwazi lokhu kuvamile ezimulini ezisemaphandleni ngoba kwenziwa ngabazali.
Omunye njalo angabuye afake agcone abazali babafundi. Yebo umntwana ukuze aphumelele kudingakala ukuthi umbalisi amfundise kabanzi ukuze azwisise, kodwa lo asumlandu wababalisi kuphela.
Ukuze ikusasa labantwabethu libe lihle kudingakala ukuthi ababalisi babambisane labazali bakhuthazane ukuthi bahlale befake ilihlo ebantwaneni bebone ukuthi bayabala ingwalo zabo ngokuqondileyo.
