uMthunywa
KUYADANISA ukuthi inengi labantu liphakathi kokukhala ngesikhathi lapho umuntu wonke kumele abe ejabula ngoba izulu linile. Izililo zinengi kakhulu loba singenelisi ukuziloba zonke, lapho imuli eyabe ihlulukelwe ngoba umntwana egalulile.
Isikhathi sezulu sihle kakhulu kodwa siyingozi ngenxa yokuthi abantwana bayabe befuna ukudlalela emanzini, ukubhukutsha phela.
Kungakho-ke kuqakathekile ukuthi abantu abagcina abantwana babakhangele ukuze isikhathi esihle kangaka singaze sacina sesingesezinyembezi.
Kuyadanisa ukuthi abantwana abancane uthola bethwele inkonxa besiyakukha amanzi emfuleni.
Izulu endaweni ezinengi linengi kakhulu lonyaka njalo ikhona imifula esigcwele phamu kungakho-ke kuyingozi enkulu ebantwaneni ngoba bona bengakhekhelezi ukungena emfuleni nxa besuke bawisela enye yempahla yabo.
Imifula egcweleyo ayisingozi kuphela ebantwaneni kodwa iyingozi ngitsho lasebantwini abadala.
Yebo amanzi ayadeleleka nxa umuntu ewakhangele, usuka abe lomcabango wokuthi ulakho ukuwachapha kalula kanti cha, amanzi alamandla ukwedlula yena.
Kungaba ngcono ukuthi abantu basebenzise indlela ezinde kulokuthi bazehlisele engozini.
Nxa njalo abadala bebona lingekho elinye icebo abangalenza kodwa befuna ukukha amanzi emfuleni, kuhle bahambe bona kumbe bahambe labantwana ukuze babalinde nxa besikha.
Abatshayeli labo siyabakhuthaza ukuthi ngalesi isikhathi sezulu batshayele kuhle ngoba phela bethwele imiphefumulo yabantu.
Uthola umtshayeli eyigijimisa ibhasi angathi utshova ibhayisikili, uthole abantu sebebambe inhliziyo ngezandla ebhasini.
Umtshayeli onje loba angaze abhalelwe itikiti akalithathi mango, usuka akhohlwe ukuthi ukugijima akusikufika.
Imigwaqo iyabe itshelela ngoba kumanzi kukanti njalo nxa izulu selisina kakhulu, umtshayeli uyabe engasaboni kuhle.
Abatshayeli bayakhuthazwa-ke ukuthi batshayele ngonanzelelo kuthi nxa izulu selisina behlise isiqubu kumbe bamise imota zabo.
Nxa ibhasi isigijima ngamandla, abantu abaphakathi kumele babambane bamkhuze njengezihambi.
Amatikiti abawanikwayo njalo nxa behlawulile alotshwe inombolo zocingo. Umuntu ulakho ukutshela umnikazi wemota ngesenzo esingabaphathanga kuhle.
Izihambi kumele zikhululeke zenelise ukuphumisela imibono yazo. Le yiyo yodwa indlela engabaphathisa ukuthi bayefika lapha abayakhona bengabaphilileyo.
Ikhefu lokuphela komnyaka lilokuphithizela okukhulu ngoba abantu bayabe besiya le lale ukuyaphumula bebona imuli zabo.
Kukanti njalo phakathi kwalokhu kuphithizela kulezigebengu ezithi zingabona abantu abanengi zibumbe amaqhinga okubahlukuluza.
