uMthunywa
NJENGOBA izikolo zivuliwe nje kuqakathekile ukuthi abazali bananzelele lapho okuhamba khona abantwana ngoba zinengi ingozi ezitshiyeneyo ezilakho ukubehlela. Kulezinsuku kunengi okungehlela abantwana okungalunganga.
Zinengi indaba eziphuma kumaphephandaba ezihlasimulisa umzimba ezikhuluma ngokudlovwa kwabantwana, ukutshontshwa kwabo kanye lokunyamalala nje okungazwisisekiyo. Abanye badlovwa yizihlobo zabo kanye labantu nje abangaziwayo. Ngalokhu kubalulekile ukuthi abazali bahlale njalonje beqaphele indlela abantwana babo abaphila ngayo.
Kumqoka ukuthi abantu bafunde ukunanzelela abangane babantwababo kanye lokwazi lapho abakhona ngaso sonke isikhathi. Phela okhekhe bayake babelobudlelwano labantu kumbe abangane abangalunganga okwenza bacine bengena emanyaleni kumbe sithi bewelwa ngamashwa.
Okunye esibona kubalulekile yikuthi abazali balimukise abantwana ekusebenziseni indledlana eziquma egangeni.
Isikhathi siza lobuhle kanye lobubi ebantwini. Siyambonga ophezulu ngokusikhulisela kuhle izilimo zethu ngokusinikeza amanzi avela emkhathini kodwa lokhu lakho sokusidalele usizi emphakathini.
O“tsotsi” bathola indawo zabo ezinhle ezokucathamela abantu ebusuku kanye lasemini libalele nxa kuyikuthi kulezilimo emasimini.
Sesinanzelele ukuthi ezinye lezi indledlana eziquma egangeni zithandwa kakhulu ngabantwana. Uyathola okhekhe bezihambela kulezindlela eziquma egangeni bengagqize qhakala bethwele izikhwama zabo bevela esikolo. Kwesinye isikhathi uyabona kungumntwana oyinkazana equma yedwa evela esikolo kumbe elubhekise lapho mhlawumbe ayabe ethunywe khona ngabazali bakhe.
Like libone-ke Mthwakazi omuhle ingozi abantwana abadlula kuzo thina singananzeleli.
Abazali abalimukise abantwababo babatshele ngokuqakatheka kokunanzelela indlela abazisebenzisayo ukuthi kungabi zindlela eziqumayo.
Siyakwazi ukuthi okwenza abantwana bazithande lezi indlela yikuthi ziyaqumela njalo zenza umntwana afike masinya lapho aya khona ukuze aphenduke azodlala ngekhaya. Abanye baquma ngoba babona abadala bezisebenzisa lezi indlela. Khuzani abantwana bazali ngomkhuba lo ingozi zingakabehleli.
Lumlandu siwubeka njalo kubabalisi ezikolo. Kumele labo baxhasane labazali ekulimukiseni abantwana ngokuhamba ngendledlana zeganga. Phela umlandu kambalisi ngowokuvikela impilo yomntwana engozini.
Ngalokhu abakhuthazwe okhekhe ekilasini ikakhulu nxa sebezaphuma ukuthi bangalinge bahambe ngendlela zeganga nxa sebebuyela emakhaya.
Lokhu mhlawumbe kuzanceda ekulwisaneni lobubi bokubhinywa kwabantwana emphakathini. Akumelanga abazali baqale ukuthwala amehlo belimukisa abantwana ngemva kokuba sokwenzeke ingozi.
