uMthunywa
SIHAMBA la emhlabeni sihlangana lezinengi ezenzakalayo ezitshiya abantu bephelelwe bengela nkani, abanye bengabathithibeleyo ngoba kuyizehlakalo ezingakholekiyo, ezimangalisayo ukuthi zenzeka emhlabeni wonalo esiphila kuwo. Nxa kukhulunywa ngondofa labomatholwane inengi lizibuza ukuthi kambe zinyamazana bani lezo, abanye ngabathi kazikho ngoba bengakaze bazibone.
Kuliviki udaba olusemlonyeni kawonkewonke ngolwezakhamizi zelokitshini leCowdray Park koBulawayo ezimi manzonzo ngenxa yokuhlala zitshaywa ngamatshe angabonakaliyo ukuthi aphoswa ngubani. Lokhu sokwenze abantu bazibuza imibuzo eminengi ukuthi ngezikabani izinto esezixhwale kangaka? Kumbe akula mnikazi ngokuyizinto osekuhlamukile nje? Pho kwenziweni ngoba abantu lapho sebehlalele evalweni.
Okusalayo yikuthi akulanto okuthiwa ayilamnikazi, kambe iyabe ivele ngaphi, nxa kuyikuthi izinto lezi esezihlukuluza abantu umnikazi wazo ukhona lapho elokitshini kazikhuze zingakabulali abantu abangelamacala, kambe abantwana bona asebetshaywa balimale boneni?
Nxa singabantu singabokwenza ukuganga okucina kulimaza abanye bethu njalo sesisehluleka ukukhuza. Nxa kuyikuthi azilamnikazi-ke lezozinto abadala besigaba kababone icebo phela kulungiswe ngendlela engasoze ifake abantu engozini, leZinatha okuyinhlanganiso esemthethweni ingaphathisa layo ukuthi lezozinto zixotshwe kulokufaka abantu engozini nje.
Lani baphurofethi liqaphele nxa lingena emizini yabantu, kukhulu okuthwelwe ngabantu okuzaliphephuluza kuliqede imiphefumulo litshiye imuli zenu zodwa. Nxa uzazi ukuthi awuqinanga dlalela kude lengozi ezinje.
Abadala bathi lapho okuthunqa khona intuthu kulomlilo, mhlawumbe bakhona abaxabeneyo khonale eCowdray Park sebephosana ngezinto lezi zokuganga sebeze bekhuthana belimaza labantu abazihambelayo.
Nxa usizwa wena mnikazi wezinto khuza izinto zakho, abantu baphelelwa zimpahla zabo.
Ikhansili layo kayibone icebo ukuthi nxa inika abantu izitanda emahlathini khonale bafake lezibane zokukhanyisa emalokitshini ngoba nxa indawo ezinje sezibhuza ondofa labo esibezwayo ziyingozi kakhulu, kumbe ngondofa abajikijela abantu kumbe kuyini, okusalayo kuyingozi lokho.
