uMthunywa
UMPHATHISIKOLO ukhangelelwe ukuthi abe ngumuntu okhokhela isikolo ngendlela yokuthi abafundi kulesosikolo kanye labazali bambone eyisibonelo njalo bathathe inyathelo lakhe.
Kuyadanisa ukuthi umuntu ethi etheswe umlandu ongaka atshaphaze amandla awanikeziweyo ngokuzenzela santando. Kulemibiko ethi umphathisikolo wesikolo seSikhoveni Secondary School esisesigabeni seMzingwane kazihluphi ngitsho ngempumela yemihloliso yesikolo lesi.
Kubikwa sokuleminyaka embalwa isikolo lesi sithola i-7 phesenti kumihloliso.
Abazali abalabantwana abafunda kulesisikolo bakhalaza kakhulu ngokuthi nxa bezama ukukhulumisana lomphathi lo ngokuthi kungenziwani ukuze kuthuthukiswe impumela yemihloliso amazwi abo atshaya phezulu kwedwala njalo labo baphathwa njengemihambuma.
Umphathisikolo, ababalisi labazali kufanele bancedisane ukuthi abafundi bagxile ezifundweni zabo okuzenza lempumela yesikolo ithuthuke.
Kuyadanisa-ke ukuthi umphathi wesikolo seSikhoveni abazali lanxa bekhanya bephathekile ngokuthi benze yonke imizamo esemandleni abo ukuze impumela yalesisikolo, okubikwa isileminyaka embalwa iku-7 phesenti ithuthuke, yena ukutshaya indiva lokhu.
Isikolo lesi kayisiso sodwa esilempumela ephansi, zikhona njalo ezinye kwezinye indawo ezidonsa ngokufanayo. Isiminengi imibiko esibhalwe ngamaphephandaba ebika ngokungenzi kuhle kwezikolo ikakhulu ezisemaphandleni kodwa kungelanyathelo elithathwayo.
Umbuzo osuka ufikele abantu ngowokuthi kambe ukungathathi inyathelo kweziphathamandla zemahofisini ezemfundo lokhu kungabe kusitsho ukuthi balobudlelwano bani labaphathisikolo laba?
Thina njengabantu sikhangelele ukuthi amahofisi kaHulumende alalele izikhalazo zabantu njalo nxa kusiba lembiko yokungenzi kuhle kwezikolo kuthathwe amanyathelo okuba kungenziwani ngalezo zikolo ukuze kuthuthukiswe imfundo yakulezondawo ngoba kwezinye izikhathi kuyabe kubangelwa yikuthi umphathi kanye lequla lakhe lababalisi bayabe bengenzi umsebenzi wabo ngokupheleleyo.
Iziphathamandla ezisemahofisini akumelanga zamukele amanyala ayiwo enza ezikolo kungathi kusemahlangeni, kumele nxa abantwana bangenza kubi emihlolisweni kuhlalwe phansi kuxoxiswane ukuze kube lomhlahlandlela wokulungisisa lolo hlupho.
Kungumbono kaMthunywa ukuthi kudingeka ukuthi abakhokhela emahofisini ezemfundo kumele bahlalise abaphathi bezikolo beme ngamazwane ikakhulu nxa kukhulunywa ngempumela yabafundi.
Ngakho asingeke savuma abaphathi betshaphaza ilifa labantwabethu ngenxa yokuthi bona badlelana labantu abalamandla.
Siyakwazi ukuthi bonke abasemandleni bawetheswa ngabanye abantu lawomandla, pho-ke kwehlulani ukuthi lowomuntu nxa esemsinda lawomandla bamethule ukuze kube lentuthuko?
