uMthunywa
AMANZI ayinsika yempilo yakho konke okuphilayo emhlabeni. Kuyadanisa njalo kubuhlungu ukuthi abantu abahlala edolobheni lakoBulawayo bathola amanzi kakhansili kanye ngeviki kukanti abanye sebelenyanga ezimbalwa bengalazi ngitsho ithonsi empompini ngenxa yokuthi amanzi asemadamu akaseneli abantu abahlala lapho.
Udubo lwamanzi lwalonyaka kumele lube yisifundo esikhulu kuzulu kanye lokhansili ngokwakhe ukuthi kudingwe ezinye indlela zokuvuna amanzi njengoba ababona ngezomumo womkhathi sebeveze ukuthi kusigaba sika 2020/21 ilizwe lizathola izulu elinengi.
Isimo samanzi lonyaka sidlule esakumnyaka ka-2006 lapho abantu bakoBulawayo ababeqala khona ukuthwala inkonxa bedinga amanzi kulelidolobho.
Lonyaka izakhamizi ngitsho lamankampani akade engavalelwa abe phakathi kwetshe lembokodo ngoba kakho osile ekuvalelweni amanzi nanko phela amanye amankampani aze aphuma kumaphephandaba eveza ukuthi kasenelisi ukusebenza ngoba akulamanzi emankampanini awo.
Indwendwe zokudinga amanzi kuma-bowser lasezibholaneni sokuyinto yansukuzonke.
Kungadanisa kakhulu ukuthi langemva kwengxaki engangale ebe khona lonyaka ikhansili yakoBulawayo ibe ilokhu igoqe izandla, ikutshaya indiva ukuthi ithathe amanyathelo angancedisa kwakhiwe ezinye indawo zokwamukela amanzi.
Mthwakazi kambe abakhokheli bangahlala bekhuluma ngento nye betshintshana amawofisi bengenzi lutho ngohlupho lokuswelakala kwamanzi esibhekane lalo?
Amadamu lapho okuthathwa khona amanzi anikwa uBulawayo kuyaziwa ukuthi ayesenela abantu ababehlala kulelidolobho kudala kodwa khathesi ngokukhula kwabantu kuyadingeka ukuthi kudingwe njalo ezinye indlela zokuvuna amanzi ezintsha ezingaphathisa kudubo lwamanzi olukhona.
Kuyacaca ukuthi isabelo seMatabeleland South kuzigaba zokuna kwezulu ezedluleyo kasitholanga izulu elinengi okutsho ukuthi njengoba kulapho okulamadamu agcina amanzi akoBulawayo, amanzi edolobho leli yikho ebe malutshwana.
Umbuzo osemqoka uthi ikhansili isibeke mzamo bani yokuvuna amanzi kusigaba sokuna kwezulu sika 2020/21? Nxa esethe avunwa lawo manzi kulemizamo bani esibekiwe njalo yokulondoloza amanzi lawo?
Akhona amankampani angaphathisa uBulawayo ekulondolozeni amanzi kodwa ikhansili kumele izimisele layo ukuthi isebenzelane lawo ngesihle ukuze idolobho leli liphucuke.
Okunye okucasulisa inhliziyo zabanengi yikuthi ikhansili iqakathekisa ezinye izinto ukwedlula udubo lwamanzi.
Kungumbono kaMthunywa ukuthi ikhansili yedolobho lakoNtuthu lithatha amanyathelo ekwenzeni imizamo yokudinga lokuvuna amanzi ukuze kube lengqubela phambili njengoba uzulu ekhangelele kuyo.
