uMthunywa
KUVIKI ephelileyo uMthunywa ulobe ngodaba olutshwaqisa umzimba olwenye indoda eyisimungulu yesigabeni seMphakathi ngaphansi kwenduna uNelukoba eHwange, okubikwa kutholakale isidumbu sayo esixukwini sikhutshwe ubuchopho.
Okudanisayo ngalindaba yikuba indoda le yabonakala izinathela utshwala komunye umuzi ngosuku olwandulela ukufa kwayo. Okunye njalo okutshengisa ukuba ukhona olesandla kukho yikuba isidumbu lesi satholakala sigqokiswe ingwane njalo lapho esasikhona kwakungela ngitsho imitshudutshudu etshengisa ukuba kwake kwaba lokulwa kumbe ukuhinwahinwa kwalindoda okuveza ukuthi yabulawa.
Indaba le kukhanya kayikafiki endlebeni zamapholisa kodwa siwapha inqobe yokuba bachwayisise ngesahlakalo lesi izigangi lezi zijeziswe.
Yimihlolo bani kambe le bakaMthwakazi? Kambe umuntu uvuka njani efile nje kukhanye sengathi akukho ngitsho loyedwa ololwazi ngokufa kwakhe yena ebesemphakathini.
Ngenxa yokuba kulezinsuku abantu sebethanda imali kanye lenotho ebuya lula bengayisebenzelanga kungenzakala ukuthi lindoda yabulawa ngumuntu odinga leyonotho yikho nje wamgqokisa lengowane ukuze kukhanye sengathi ngumuntu ozilaleleyo nje.
Kambe bakaMthwakazi sesingabulalana njengenkukhu ngenxa yokuthanda nje imali kanye lenotho? Uthando lona solwayangaphi kithi? Ukusebenza gadalala yikho kuphela okunganika umuntu inotho engeke yachitheka ngemva kwelanga elilodwa.
Kungumbono woMthunywa ukuthi aluba abantu bakaMthwakazi bayathadana omunye lomunye abe lipholisa lomunye isizwe sethu singaphumelela.
Kuyadingeka ukuthi amapholisa kanye lezakhamizi zakule indawo basebenzelane ndawonye ukuze kudingwe umkhondo wesigangi esenza icala leli. Sikhuthaza izakhamizi zakule indawo njalo ukuthi nxa zifinyelelwa ngamapholisa echayisisa ngendaba le ziphathisane lawo ngoba ukucatshisa isigangi lesi ngeke kuzisize ngalutho kodwa kuzenza siqhubekele phambili sibulala abantu ngoba inja ivele ingaqhoba ithambo iyajayela.
Angithi nje abadala bathi okulempondo akufihlwa emgodleni kuzavela egcekeni nomakanjani onguye owabulala indoda le kodwa lokhu kuzafezeka kuphela kungaba lokuncedisana kukazulu lamapholisa.
Kumele sinanzelele njalo bakaMthwakazi ukuthi ukuganga sekubhahile kungakho-ke kungumlandu wethu sonke ukuthi sikulwise ukuze siphile ngothando langoxolo.
