uMthunywa
SIHLANGABEZA umnyaka omutsha ngeSonto.
Sibonga uNkulunkulu ngakho konke okuhle asenzele khona, ikakhulu ukusigcina siphilile imihla ngemihla.
Ukuza komnyaka omutsha, kuza lezithembiso zempilakahle njalo. Kubalulekile ukuthi sonke sibelenhlelo ezinhle ezibeka impilo zethu kuzinga elingcono.
Singene lumnyaka sikhangelele okunengi okuhle. Nanti izulu liyana, lomkhathi uthembisa ukuveza amayezi sithole isivuno esihle. Asiqineni emasimini ngoba yikho okuvela khona ukudla.
Nanti izulu liyana, lomkhathi uthembisa ukuveza amayezi sithole isivuno esihle.
Isicebiso sephephandaba likazulu ngesithi asingeneni umnyaka ozayo sizimisele ukuthi senze ngcono kulalokho ebesikwenza. Amaphutha wobuvila kumele asale emuva.
Ukukhala akusizi.
Abalimi, isigaba ngesigaba abasebenzele ukwengeza isivuno, isizwe sigcwalise isiphala, abantu basuthe. Angithi uHulumende uhlala esitsho ukuba ilizwe lakhiwa ngabaninilo, akube yinhloso yethu sonke ukuthi ngomnyaka ozayo sisebenzele ukuguqula impilo yethu kwelingcono.
Akulamuntu ongasukumisa isizwe ngaphandle kwethu.
idamu uGwayi-Shangani
UHulumende uphezulu kwenhlelo lamaphurojekithi amanengi abalisela idamu leGwayi Shangani lamagetsi eHwange.
Amaphurojekithi anje nxa ephela azakuba yinsika yokuphumelela kwelizwe. Idamu leGwayi Shangani kukhangelelwe ukuthi litholise idolobho lakoBulawayo amanzi, lezigaba zeMatabeleland North zithola amanzi kulinywe, kusuthe abantu. Konke Lokhu kudinga ukuhlakanipha kokuzimisela ukusebenza gadalala.
Hwange power station
Ukudonswa kwamagetsi esuka ku-Unit 7 loUnit 8 eHwange, ngokubika kukaMongameli uEmmerson Mnangagwa, kuzavuselela umnotho welizwe. Amankampani azathola amandla kagetsi kuvulwe imisebenzi, umkhonomi ubekuzinga laphezulu.
Singakhohlwa futhi ukuthi umnyaka esiwulandayo ngowamavoti. Sikhulekela ukuthola lokuzwisisana.
Umnyaka lo esiwugqibayo ubusiphathele okwawo, njalo bezikhona inkinga, kwabakhona injabulo.
Okumqoka yikuthi siwuphetha singabaphilileyo.
Kithi sonke esikusimo esihle, asingakhohlwa ukuncedisa abanye bethu. Bakhona abaswelayo, bakhona njalo abagulayo.
Sisanda kuphuma kuCovid-19 njalo imali ibingatholakali lula.
Asifundeni ukwelula isandla, siphe labo abaswelayo.
Sizajabula seqe emoyeni kodwa singalibali ukuthi iminwe ayilingani. Kulokhu okuncinyane esilakho asabeleni abanye bethu abangelakho. Sibusisiswe esiphayo.
Kunengi lezizalwane zakuleli umnyaka ka2022 ubungumnyaka onzima. Sisanda kuphuma kuCovid-19 njalo imali ibingatholakali lula. Abanye balahlekelwe yimisebenzi.
Silifisela ikhefu lomnyaka omutsha elilenjabulo.
