uMthunywa
KUQAKATHEKILE ukuthi abazali banakekele abantwana ezindlini. Kulabo abagcina abantwana ezindlini zokondla kuhle labo bahlale bebakhangele ngaso sonke isikhathi. Lokhu kungenxa yokuthi umntwana kacabangi njengomuntu omdala, okuyingozi yena kakuboni kuyingozi.
Kuyadanisa ukuthi abantu bacine sebebuthene bekhala ngenxa yesehlakalo esingabe sithe senzakala ebesilakho ukuthi sivikeleke lula.
Kuyingozi-ke ukuthi abadala baphume endlini batshiye abantwana bebodwa. Balakho ukusala bedlalisa izinto eziyingozi ezinjengengqamu, umlilo, umuthi lokunye okunjalo kukanti njalo balakho ukusala bevakatshelwa yizigangi.
Abadala bazakuthi bethi bayafika bathole umntwana mhlawumbe usengogijinyiswa yisisu kumbe ngosekhala ngobuhlungu obuthize obusemzimbeni wakhe. Awusoze wazi-ke wena mzali ukuthi kuyini okungabe kubangele lokhu. Kuyafana lakunhlanganiso ezondla intandane, umntwana uvele uthanda ukubambabamba yonke into.
Kungakho-ke nxa abadala bephuma bangabe besiyavakatsha kumbe besiyakwenza umsebenzi othize kuhle batshiye umuntu osekhulile ukuba abe yilihlo kulezingane.
Okunye osekusenza kube yingozi enkulu kakhulu ukutshiya abantwana bebodwa yikuthi sekulezikliwi ezihlala zilindele ukukwenza okubi.
Umntwana ulakho ukuthunjwa kumbe njalo ukubanjwa iganyavu atshiywe elomkhuhlane wengculazi.
Yebo kwesinye isikhathi lezi ingozi zenzakala kungela ukuthi besingazivikela njani kodwa-ke kuqakathekile ukuthi nxa ikhona indlela esingazivikela ngayo sizame ngazo zonke indlela.
Kuyanceda njalo ukuthi abadala nxa bebona umuntu othe ukuba afike esigabeni bemsolela baphange benze umhlangano badinge ukuthi benzeni kumbe bamqonde bayembuzisisa hatshi ukuthi uma esetshontshile kumbe esenze ubugebengu obuthile bakhale bona besazi ukuthi bebelakho ukuzinceda.
Impilo yabantwana elizweni lakithi isisengozini enkulu kakhulu ngoba phela abantu bebakhahlameza besazi kamhlophe ukuthi akula lapho umntwana angagijimela khona.
Abanye ngababamba abantwana iganyavu bethi bebezelapha kuthi abanye bethi bebedakiwe, kodwa okusalayo yikuthi bayabe benze ulunya olukhulu kakhulu.
Ngithemba yisifiso somuntu wonke lapha elizweni ukuthi abomthetho bajezise izikliwi lezi ngendlela ebuhlungu kakhulu ukwenzela ukuthi abanye abantu bafundele kuzo.
Zikhona njalo ezinye izigangi ezithi loba zenze isihluku kungane ezithile zitshone zibaleka kuthi abangane bazo bazincedise ukubaleka.
Kuqakathekile njalo ukuthi izikliwi eziphatheke kulo umsebenzi omubi kangaka zihlale zisazi ukuthi akulaqili elake lazikhotha emhlane. Kuzakuba lilanga elilodwa zwi lapha abazabanjwa khona. Kuyingqobe yawo wonke umuntu ukubona ukuthi bonke abephula amalungelo abantwana bayamiswa phambi komthethwandaba nanku phela umntwana ngowomuntu wonke njalo uthembele kithi ukuba simvikele kulezi izigebenga.
