uMthunywa
KULEZINSUKU imuli ezinengi zilala ngezibomvu emadolobheni kunye lasemaphandleni. Kuyajabulisa ukuthi abantu sebesidla baze balahle okunye, sebekhohliwe ubuhlungu bemzimba obokuvuka ebusuku lize litshone bekhotheme emasimini.
Abantu kuhle bakhumbule ukuqaphela amasela, alindela ukudla izithukuthuku zabanye. Abanengi sebeqalisile ukuvuna umumbu bewufaka engalanini. Konke lokhu kusenzakala amasela lawo ayabe eqaphele elindele khona ukuthi ayotshontsha umlimi athole ingalane isibetha umoya.
Amasela andise ukutshontsha izilimo zabalimi yilawo ayabe evele esazi abanikazi besivuno futhi besazi ukuthi ngesikhathi esithize bayabe bengekho eduzane.
Ukutshontshelwa lokho okusebenzele nzima kubuhlungu okumangalisayo njalo kwenza lo otshontshelweyo afisele lelo sela konke okubi.
Lonyaka abalimi phose bonke abaselizweni lakithi bakhangelele ukuyitshaya inala futhi inengi labo ngeke bazihlupha ngokuthenga amabele umnyaka lo.
Kukanti labo abazahambisa isivuno sabo esiphaleni selizwe eGrain Marketing Board labo bazake bahlekele esikhewini lonyaka ngoba bezathola imali engcono kuleyakuminyaka edluleyo.
Kungumbono waleliphephandaba njalo ukuthi njengoba abalimi beqalisa ukuvuna ukuthi baphathe kuhle ukudla abazakuthola ngoba ikusasa kalaziwa.
Kungenzakala ukuthi loba ngesigaba sika 2020 kusiya ku-2021 izulu libe linengi lonyaka libe lilutshwana kodwa nxa abantu bangaphatha kuhle isivuno sabo lakumnyaka ozayo bangabe belokhu bedobha dobha lokhu lalokhuyana okuseziphaleni zabo.
Kungumlandu njalo wabazali ukuba bafundise abantwababo ukuthi ukusebenzisa izandla zabo yiyo kuphela indlela engabenza bathole ukudla kunye lemali yikho nje uMdala wesizwe, uJoshua Nyongolo Nkomo wake waxwayisa uMthwakazi wathi nxa umuntu efuna imali kaphendulele ibala elithi “imali” lona eliba ngu “lima” okutsho ukuba ungalima uzathola imali.
Inkulumo kaMdala wesizwe kube sobala lonyaka ukuba iliqiniso njalo elingeke litshintshe. Labo abalimileyo ngempela lonyaka bazabe bekhomba ngophakathi ngoba bazakudla batshayane ngakho ukudla ngapha bazitholele lemali nxa beyilabo abalesifiso sokuthengisa njalo.
Kungumlandu womzali wonke-ke ukuthi abone ukuthi amajaha kunye lezintombi azondlileyo ikakhulu nxa indawo yokulima ikhona ukuba abafundise ukulima kanye lokuqakatheka kokusebenzisa izandla zabo. Kuyadanisa ukubona abazali beyibo abasebenzayo abantwana bezihlalele begoqe izandla. Ukuze-ke sivikele ukwanda kwamasela kungumlandu wabazali bonke ukuthi bafundise abantwababo imisebenzi engabaphilisa kwelakusasa ngoba abadala bavele bathi isigogo sigoqwa sisemanzi. Baphinde njalo batsho bathi kuhle zibanjwe zisemaphuphu ngoba zingaba lamaphiko ziyandiza.
