uMthunywa
UKUTHUTHUKA kwezokukhulumisana lokuhanjiswa kwemibiko kuyinto enhle kakhulu njalo kungaletha inguquko ebalulekileyo emphakathini nxa kungasetshenziswa ngendlela eqondileyo.
Kuqakathekile njalo ukuthi abantu banazelele izingozi eziza ngenxa yalokhu kuthuthuka kwezokukhulumisana lokuhanjiswa kwembiko nanko phela sekulokuganga okunengi ngenxa yobulembu.
Ngenxa yendlela zokukhulumisana ezifana labo-Twitter, WhatsApp laboFacebook, sekulokuganga osekubhahile kakhulu emphakathini, abantu bayathethisana, beyisane kanye lokuthumezelana imibiko lemifanekiso ehloniphisayo.
Ngenxa yalokhu kuganga, isizwe asisakheki njengoba lemizi isichitheka mahlayana nanko phela ubulembu sebubangele ukuthi abanye abantu bangathembeki emitshadweni yabo.
Akula nto embi ngokusebenzisa ubulembu ngoba buyindlela elula njalo eyenelisekayo yokukhulumisana kodwa uhlupho yikuthi abantu basuka babusebenzise ngendlela ezingafanelanga.
Esikhathini esinengi kuqala sakudlala kodwa abantu bacine sebejola sibili. Uthole umuntu otshadileyo lanxa ehlezi lomkakhe abelokhu ephethe ehleka yedwa kumakhalekhukhwini wakhe.
Abanye njalo ngabathumeza amabhayisikopo kanye lemifanekiso yabantu abanqunu. Kambe nxa abantu abadala bezakwenza izinto ezifana lalokho, mfundiso bani abayinika abantwana?
Kwezinye izikhathi umphakathi wawusole abantwana nxa sebeziphatha butshapha ulibale ukuthi abantwana labo ba yilokhu abayikho khona ngenxa yalokhu abakubona kubazali babo.
Ingozi enkulu kakhulu kulezinsuku yikuba izimuli sekungenzeka futhi ukuthi zingabambani njengoba umama uyabe ekhangele umakhalekhukhwini wakhe, ubaba laye ngokufanayo ekhangele owakhe, labantwana labo bayabe bethe nhlo kwababo omakhalekhukhwini. Isikhathi nje semuli kasisekho sokuguquke kwaba yisikhathi sebulenjini.
Kungumbono kaMthunywa ukuthi uzulu wonke nga uyananzelela indlela asebenzisa ngayo ubulembu ukuze kwenqatshelwe ukumemetheka kwengozi eziza ngenxa yokusebenzisa ubulembu ngendlela engafanelanga.
Kuqakathekile ukuthi abazali bonke bananzelele ukuthi nxa labo besebenzisa ubulembu, babusebenzise ngendlela ezakuba yisibonelo lakubantwababo, kube yindlela eyakhayo.
Kuqathekile ukuthi sisebenzise ubulembu njengendlela ezosisiza empilweni lekwakheni isizwe hatshi njengesikhali sokubulalana lokuzibulala.
