uMthunywa
IPHELILE imihloliso yebanga le-Ordinary Level le-Advanced Level ezikolo zakuleli. Abafundi sebelinde impumela yokusebenza kwabo.
Abazali labo balinde ngabomvu impumela le nanko phela basebenze nzima ukubhadala indleko zokufunda lemali yokubhala imihloliso le engaphansi kogatsha lwe-Zimbabwe School Examinations Council, iZimsec.
Ngesikhathi kulotshwa imihloliso le, kuvele indaba ezingaphathi kakuhle abafundi labazali. Kubikwa ikhona imihloliso ebithengiswa ngudlu, kukhitshwa amaphepha emibuzo ngokungekho emthethweni.
Abanye abafundi babhale sebesazi ukuthi imibuzo ihlelwe njani.
Phose imihloliso edlula itshumi ithengiswe ezitaladeni lonyaka, okuyikho osekutshaphaze imihloliso lekhansili yemihloliso eyeZimsec. Kambe abafundi balobe imihloliso eyiyo na? Impumela yemihloliso le izabe iyiyo na?
Kuyaziwa ukuthi kuzakuba lensolo thile mayelana lempumela yemihloliso le eyaba lamaphepha athengiswayo. Kuzakuba labafundi, ababalisi labazali abazasola ikakhulu nxa iZimsec izakhipha impumela abangavumelani layo.
Kuliviki kuphume udaba lomphathisikolo weThokozani Secondary School uGainmore Muzezewa okubikwa wavula amaphepha omunye umhloliso we-Ordinary Level ngenyanga edluleyo. Kusobala ukuthi abafundi bakhe bathola ithuba lokuthi bafunde umhloliso andubana bebhale.
Umphathisikolo lo ayisuye yedwa. Banengi, njalo umkhuba lo awuqalisi.
Ikhansili yeZimsec ihlezi iphethe amacala anje kodwa akukabi loyedwa owajeziswa okuzwayo.
Ikusasa labafundi lisengozini ngenxa yabaphathi abanjengoMuzezewa lezinye izigilamkhuba ezinjengaye.
Ukwehluleka ukujezisa abantu abanje kudala ukuthi amacala la ahlale ekhona ngoba abantu bekubona ukuthi iZimsec ayenzi lutho.
Loba iZimsec kuliviki ikhiphe umbiko wokuthi isiqalile ukuthatha amanyathelo, ilizwe lisalinde ukubona ukuthi ngempela izakwenelisa lokhu. Eqinisweni, kuyaziwa futhi ukuba zikhona izisebenzi ze-
Zimsec eziphakathi kwayo yonke linkemenkeme.
Abathengisi bemihloliso laba mhlawumbe basebenza beliqula eliqoqekileyo, kusukela eZimsec kusiyafika kubabalisi labaphathi bezikolo.
Kumbiko wayo iZimsec ithe isisebenza lohlangothi lwamapholisa olwe-Forensic Unit oluzacazulula wonke amacala la. Ithe amapholisa azalandelela bonke abafundi abathenga kumbe ababona imihloliso kunkundla zokuxhumana ikakhulu ku-WhatsApp lakuTelegram.
“Bonke abenelisa ukubona imihloliso ingakalotshwa sebebanjwa. Impumela yabo kumihloliso le izesulwa kulandelwa umthetho weZimsec uSection 34,” kutsho iZimsec.
Ilizwe selithembele kuZimsec lamapholisa ukuthi basebenzise ingalo yomthetho ifinyelele zonke izikliwi ezijonge ukubulala ikusasa yabantwabethu.
Phela ukutshontshwa kwemihloliso lokhu kukhanya angathi kuvame emadolobheni kuphela. Lokhu kuletha imibuzo eminengi emphakathini. Kambe umntwana ofunda eTsholotsho engabe ezathola impumela eyiyo na nxa eqathaniswa lalo ofunda koBulawayo lapho okutshontshwa khona amaphepha emihloliso?
Le yiyo imbuzo esilayo sibanengi. Sizaqakezela izandla abafundi abathile sithi banqobile ikanti baqilile, besebenza lababalisi labaphathi bezikolo zabo.
Iphephandaba likazulu selike laphatha udaba lwabaphathi bezikolo abangela ndaba lempumela yemihloliso yabafundi babo.
Kuvela khonapho ekuthini abanye ngabaqinela ukuthengisela abafundi abathile imihloliso le.
Mhlawumbe batshontshela izihlobo zabo.
Kungumbuzo wethu kuMthunywa ukuthi kungani iZimsec ithulisele. Kungumbono kaMthunywa njalo ukuthi bonke abatholakala belecala lokuthengisa imihloliso babotshwe ngoba babulala ikusasa lelizwe.
