uMthunywa
Sokukanengi sibala emaphephandabeni ngobugwelegwele babaphathisikolo abahuquluza izimali okumele zithuthukise izikolo.
UMthunywa ngelinye lamaphephandaba aselobe kanengi ngobugwelegwele abaphathisikolo ababenza lamaSchool Development Committees (SDC) wona abona ngokuthi imali isetshenziswa ngendlela eqondileyo ezikolo.
Isimanga yikuthi lamaSDC esiwathembayo njengabazali babantwana yiwo futhi acina esexhasana labaphathisikolo ekuhuquluzeni imali zesikolo.
Ukutshontsha imali zesikolo kulakho ukwenza abantwana bangaphumeleli kuhle ezifundweni zabo ngoba phela amabhuku kanye lenye impahla esetshenziswa ukufundisa abantwana icina ingaseneli abafundi okuyikho okwenza abanye bafeyile.
Kuviki ephelileyo uMthunywa uzwe ukuthi kulomphathisikolo weNtalale Primary khonale emaphandleni eGwanda okuzwakale ukuba ngesikhathi kuhlolwa amabhuku esikolo emali kwatholakala ukuthi kulemali efika phose i$7 000 kanye leR2 080 engabonakaliyo ukuthi yasetshenziswani.
Kambe zulukandaba imali engaka ibingeke isithuthukise isikolo lesi sicine sesifanana lezinye izikolo ezisemadolobheni? Baphathisikolo liyasiyangisa ngezenzo zenu lezi, kambe alizweli abazali abathwala qatha ekukhipheni lezi izimali zesikolo?
Iziphoxo zithi inyamazana ivele idla lapho ebotshelwe khona, kodwa hatshi ngemali zabantwana besikolo ngoba le yimpilo yabo yakusasa eliyitshaphazayo. Layo inyamazana angithi idla lapho ebotshelwe khona ngoba iyabe ingela enye indawo lapho engabufukutha khona utshani. Pho wena mphathisikolo ongasiyo lanyamazana ungcono ngoba uyakwazi ukuthi elakho iholo lingena nyanga zonke.
Sesinanzelele futhi ukuthi esikhathini esinengi izikolo ezilabaphathi abenza ubugwelegwele yizo ezingenzi kuhle ezifundweni.
Ngalokhu sikhuthaza uHulumende ukuthi aqinise umthetho ezikolo njalo ahlolisise ukuthi imali ezinikwa izikolo ukuthi zithuthuke, ngempela ziyenza khonalokhu kanye eziyabe zikunxwanele. Kusasa abantwabethu nxa sebenze kubi kumihloliso yeZimsec siyaqala ukugcona ababalisi sisithi kabafundisi kanti ngitsho akulampahla eyenelayo eyokufundisa. Layo ingekho hatshi ngokuthi imali kayikho kodwa ngenxa yobuqili babanye abaphathi.
Amabhuku okusetshenziswa kwemali kawahlale ehlolwa kuthi abaphathi abatholakala ukuthi bazitshayela esikhewini imali zesikolo bajeziswe.
