uMthunywa
UKUCHITHEKA kwemitshado sekuyimvama kulezinsuku njalo kukhanya sengathi kulezinsuku imithethwandaba iphatha indaba zokwesula imitshado ezinengi ukwedlula ezokuhlanganisa abantu emtshadweni.
Imbangela zokudilika kwemizi eminengi zibalisela ukuzondwa ngabalapho umuntu athethe kumbe endele khona, indaba zemali, ukungahloniphani, ukungazwisisani kanti esimqoka kulezinsuku yikungathembeki.
Kuliviki uMthunywa uqukethe udaba lwesinye isakhamizi esaxabanisa umama lomntanakhe njengoba leso sakhamuzi kubikwa ukuthi loba sasithandana lomama kodwa sacina simithisa umntwana, isenzo esesibangele ukuthi ubudlelwano phakathi komuntu lomntanakhe bubemunyu.
Udaba lolu olulokhu lusemlonyeni kazulu luyingxenye nje yezinye indaba ezifana layo ezenzakala kuleli.
Esikhathini esinengi, imitshado icina idilika ngoba lapho okungasela kwethembana khona uthando lenjabulo lakho kuyatshabalala singabe sabakhona isizatho sokuthi abantu baqhubeke behlala ndawonye.
Njengoba abadala betsho ukuthi lapho okulwa khona indlovu ezimbili, utshani yibo obufayo. Ngokunjalo ke ukuchitheka kwemitshado kuhlukuluza kakhulu abantwana ngoba ukukhuliswa ngumzali oyedwa akusinto emnandi noma kuwuphi umntwana.
Kusobala ukuthi labo abazali uqobo aluba bebesezinyweni zabantwababo bebengeke bathande ukondlelwa emdenini ochithekileyo, bebengafuna ukukhula belabazali babo bonke. Abanye baba lenhlanhla bakhuliswa ngabazali babo bonke. Pho osekunzima ukuthi baphe isipho esifanayo kubantwababo kuyini?
Abanye balomkhuba wokuvika ngomunwe nxa bebanjwe bejola emitshadweni yabo. Umuntu uqamba lokhu lalokhuyana njengezizatho ezimenza angethembeki komunye wakhe. Kanengi izizatho zakhona ziyabe zingelangqondo njalo zingesinto engaze ibangele ukuchitheka komuzi.
Ingani abadala bayatsho nje ukuthi okoniwa ngomlomo kulungiswa ngomlomo. Kuqakathekile ukuthi abantu bakhulumisane, badinge indlela engcono yokulungisisa inkinga zabo kulokuthi kuhle kuchithwe umtshado. Nxa kusehlula ukuthi bazenzele lokhu, abakwenzele abantwababo. Kwesinye isikhathi abanye abazali basuka bazicabangele bona bodwa bakhohlwe inzalo yabo.
Kuqakathekile ukuthi abantu bazihloniphe kuqala ukuze bakwazi ukuhlonipha omkabo kanye lemitshado yabo.
Umuntu ohlonipha umtshado wakhe angeke atholakale ejola ngaphandle komtshado. Abanye baze baphe omakhwapheni babo inombolo zikamakhalekhukhwini zabomkabo ukuthi babathethise. Konke lokhu kutshengisa ukuswela inhlonipho yemitshado yabo.
Kungumbono woMthunywa ukuthi nga abantu bonke abatshadileyo bazipha umlandu wokulondoloza imitshado yabo, bayivikele ekuchithekeni ngokwenza izinto ezifaneleyo ngesikhathi esifaneleyo. Kuqakathekile ukuthi lalabo abakhulelwa zinkanuko bazithole sebejola bazame ngazo zonke indlela ukuthi bakufihle ukuze kungaveli ngoba kudiliza imizi kubangele lokuhlukuluzeka kwabantwana abangelamacala.
