uMthunywa
KULEZINSUKU kuyimvama ukuzwa kumbe ukubona umuntu wesilisa eziphatha kumbe egqoka njengomfazi. Bakhona njalo abesintwana obathola beziphatha njengamadoda akuseyinto emangalisayo. Lokhu asazi ukuthi kuvela ngaphi ngoba kwelikaMthwakazi bekungekho lokhu izolo. Asazi kumbe kusafashini ukuthi umuntu ongumfana akhangele omunye njalo ongumfana ambone njengomuntu angazikhohlisa laye. Intsha yakulezinsuku ikubona kuyinto yesimanje ukugqoka ngendlela engayisiyo yobulili bayo. Lokhu kuyethusa njalo akusikho kulandela indlela umuntu adalwa ngayo.
UNkulunkulu wathi esidala wadala umuntu wesilisa lowesintwana. Wakwenza lokhu ekwazi mhlophe ukuthi ufuna kubelobudlelwano bani phakathi kwalaba ababili.
Akazange athandabuze ngokudala izidalwa zakhe lezi ezimbili ngoba vele yiyo indlela ayefuna ukuzidala ngayo, njalo wayesazi ukuthi ngendlela abadale ngayo lababantu bazakuba lakho ukuzwana ngendlela ezithile.
Amantombazana lawo kukhanya asethandana lamanye amantombazana into ehloniphisayo njalo efana xathu lokuthethisa uMdali.
Kuyadanisa njalo kuyadabukisa ukuthi isizwe sesiphenduke saba yinto eyenyanyekayo ngenxa yabantu abathathwa ludumo bengazi lento abayenzayo. Kanti vele ngubani owathi kuyinto ebukekayo yonale esisenziwa ngabantu abanengi kangaka?
Akuseyinto eyangisayo ukuthi umuntu avele egcekeni azise uzulu ukuthi yena uyisitabane nxa sekusiza kwezothando.
Yikho lokhu okwenza uMongameli welizwe lethu uKhomuredi Robert Mugabe agcizelele ukuthi ubutabane abufunakali elizweni leli ngoba uyazi ukuthi umbhalo lawo uyakutsho ukuthi owesilisa uzatshiya abakibo ayemanyana lowesintwana bakhe owabo umuzi. Kwadalwa ngusathane ngokwakhe efuna ukuphambanisa abantu ngendlela zakhe ezitshekileyo.
Ngempela lokhu kulihlazo njalo nxa ungumzali osuke wasusizwa ukuthi umntanakho uzibanibani usebonakala egqoka amabhulugwe abambayo, njalo usezicombacomba njengentombazana inhliziyo ingakweqela uphose ufe.
Abantwana bakithi labo sebehawukela okwenziwa khonale eGoli njalo sebekuthatha bakwenze ifeshini khepha sebebanengi asebephila ngalindlela.
Kuyinto embi kakhulu ukweboleka imikhuba yabanye abantu ngoba uzaboleka izinto ezizakubeka engozini.
Kungakho-ke sikhuthaza intsha yakuleli ukuthi ingalingi ihawukele izinto eziyingcekeza ngoba isizwe esiziphatha butshapha simane sitshabalale masinyane.