uMthunywa
UHULUMENDE wakuleli uphakathi kokuqhuba uhlelo lokunika amandla omnotho kuzulu. Inhlelo kanye lemithetho embalwa isiyethulwe ukuze loluhlelo lukaHulumende lukaVision 2030 lube yimpumela ukuze kuthuthukiswe impilo zosapho lweZimbabwe kanye lomnotho wakuleli.
Phakathi kwalezinhlelo, zokuthuthukisa uzulu, olunye uhlelo olumqoka ngolokuthenga lokuthengiselana.
Akulalapho ongaya khona kuleli ungahlangani labantu abathengisayo. Ezindlini, emigwaqweni, lakuzozonke indawana.
Ngenxa yalokhu, uzulu usetholakala ethengisa lezinye izinto ezihloniphisayo. Emuva amaphephandaba ake agcwala indaba zokuthengiswa kwezinto ezifana lamanzi okugezisa izidumbu, ubudoda kanye lomthambiso wamanina azithweleyo.
Kuviki ephelileyo amaphephandaba abequkethe udaba lwenye indoda yeMvuma eyathi ngenxa yokuthanda imali yabulala umkayo ngoba ithenjiswe imali efika iUS$5 000. Kubikwa kulamadoda amabili ayedinga izitho zowesifazana ezibalisa ulimi kunye lamabele ukuze bayokwenza ukuganga lobuthakathi.
Indoda leyo yathi isizwe ngemali yasuka angathi iphelekezela umkayo esiya emsebenzini kanti yona sisiyaqeda ngaye egangeni. Kulusizi ukuthanda imali ngalindlela ngoba lindoda yaba lesibindi sokubulala umkayo phambi kosane lwayo njalo kayizange ikutshaye indiva ukuthi umntanayo sezasala engelanina ngoba ithenjiswe imali.
Kuyadanisa ukuthi abantu abayibo abathengisa lezo zitho abakwazi ukuthi labo abazithengayo bazisebenzisani. Bazi kuphela ukuthi zithengwa kakhulu ngabantu “abayalungisa impilo zabo”.
Okubuhlungu kakhulu yikuthi abantu abayibo abafuna ukusebenzisa lezo zitho izikhathi ezinengi kabazivezi kodwa basebenzisa abanye abantu ukuze bathole lezo zitho.
Ukuthengiswa kwezitho kutshengisa ukutshabalala kwamasiko kanye lenhlonipho osekusemhlabeni ngenxa yothando lwemali.
Lobu yibuthakathi mpela njalo lenotho yakhona ayibusisekanga ngoba yinotho yegazi. Nxa umuntu ezabulala umkakhe athathe amabele lolimi lwakhe ayekuthengisa kambe lowomuntu angabe efanele ukuphila esigabeni labanye abantu na?
Yona imali yakhona oyithola ngemva kokuthengisa lokho ingabe isabamnandi usazi ukuthi ulesidumbu phansi?
Indlela abantu asebethanda ngayo imali iyethusa, ngoba lokhu kufana xathu lokuthengisa umuntu nta.
Ngalokhu ke kungumbono kaMthunywa ukuthi nga uzulu usebenzelana lenhlangothi ezibona ngokugcinwa kwemithetho ukuze zonke izigilamkhuba ezenza amacala afana lala zinikwe udilikajele.
Phezu kwakho kuqakathekile ukuthi uzulu azinike umlandu wokulondoloza amasiko lobuntu babo ngokwenza izinto ezifaneleyo isikhathi sonke.
