uMthunywa
IMPUMELA zabafundi bogwalo lwesikhombisa emfundweni yaphansi luke lwaba yindaba esegudwini ngenyanga kaNhlolanja. Abazali njengoba ukuvulwa kwezikolo sokusondele bazidla ingqondo ubusuku lemini ukuthi bathini ngabantwababo abazabhala imihloliso yalonyaka yoGwalo lwesikhombisa, Fomu 4 kanye loFomu 6.
Kuluhlu lwempumela zabafundi bomnyaka ka2020 bogwalo lwesikhombisa kwavela ukuba izikolo zesabelweni seMatabeleland North kazenzanga kuhle njalo elizweni nje lonke jikelele izinga lokupasa kwabafundi lehla.
Kuyadanisa ukuthi ngemva kokukhipha amaqubaquba emali umntwana ehluleke ezifundweni zakhe, lokhu kucina kubangela ukuthi abazali babone angathi ababalisi bazidlela imali zabo bengelandaba lokuthi bafundise abantwana.
Kule iviki indaba esegudwini ngeyokuvulwa kwezikolo njalo abazali behla besenyuka besenza amalungiselelo okuba abantwana babuyele ezikolo.
Okudida abazali yikuba abantwababo okumele babhale imihloliso lonyaka nyakenye kabazange bafunde okuyangaphi ngoba ababalisi babephose amajogwe phansi befuna ukungezelelwa iholo.
Kuyadingeka ukuba ababalisi njengoba zivulwa izikolo bazimisele emsebenzini wabo ukuze benelise ukufundisa abafundi phose konke okukhangelelwe ukuba abafundi babekwazi nxa kumele baphumelele kumihloliso.
Kungadanisa ukuthi ababalisi bethi sebehlale inyanga ezimbili lengxenye ngekhaya baphinde bazidonse emsebenzini wabo kulokuthi badonse ngamandla ukuze bavule abantwana ingqondo ngesikhathi belungiselela imihloliso yabo.
Kungumbono kaMthunywa ukuthi ababalisi, abafundi kunye labazali bangasebenza nzima kungaphathisa ukuba baqhube zonke izifundo abakhangelelwe ukuthi bazenze kusiyafika isikhathi sokubhala imihloliso.
Sixwayisa njalo ababalisi ukuthi bangathathi ithuba ngesimo esikhona ukuthi benze imali baqale ukwenzisa abantwana ababafundisa emakilasini ama-extra lessons. Lokhu kungaba khona kuzabangela ukuthi labo abaswelayo bangabi besafundiswa ngendlela ngoba umbalisi esenzela ukuthi abuye ngudlu azomfundisa ngoba efuna imali.
Kuqakathekile ukuthi ababalisi bakwazi ukuthi njengabo abadinga imali ngamehlo abomvu labazali labo bathwala nzima ngendlela efanayo ukuthi bathole okungamasenti abakubhadala esikolo.
Okunye okuyisimanga yikuthi ababalisi sebesehluleka ngitsho lokuthi bazinuke amakhwapha babone ukuthi abakwenzayo akuqondanga ngitsho lakancinyane.
Kuyadingeka ukuthi njengoba kungumnyaka omutsha abaphathi bezikolo bazame ukulandelela ababalisi ukuze babone ukuba baqhuba umsebenzi wabo ngendlela hatshi ukuthi kukhanya angathi bayafundisa bona betshona bezihlalele emakilasini.
Kungumbono kaMthunywa ukuthi ababalisi kumele baqakathekise imfundo yabantwana hatshi imali ngoba abantwana laba yibo abakhokheli bakusasa.
