uMthunywa
Cornelius Luphahla
SOKUKOMPUNZI idla emini esigabeni seZenka eNkayi nanko phela izakhamizi zakule indawo sezithengiselana umbane emphakathini zingagqize qhakala.
Indaba le ehlasimulisa umzimba ivele egcekeni ngemva kokuba uMnumzana Tawanda Mapfumo loMnumzana Joseph Moyo bebonakale bethengisa inkosazana emini libalele esililweni ebesikulesisigaba kuviki ephelileyo nge$1.
UMthunywa ukhulumisane lesinye isakhamuzi sakule indawo esiziveze ngokuthi nguNdlovu nje kuphela sathi bathi besemfeni komakhelwane uMapfumo loMoyo bathutsha bethwele imithi bethi lizulu bayalithengisa.
“Sathi sisemfeni yakomakhelwane kwathutsha uMapfumo loMoyo bethwele imithi bethi yinkosazana bayayithengisa ngemali engange $1 kuphela. Sathi sibabuza ukuthi usebenzani bathi ungawuthenga bayakufundisa ukuthi uyenze njani ukuze utshayise umuntu okuhluphayo ngawo kumbe utshayise izifuyo zakhe.
“Lokhu kwangethusa kakhulu ukuthi kambe kulomuntu ongathengisa inkosazana njengoba ngangingazi ukuthi iyathengiswa. Ngikhuluma nje abanye bawuthenga umbani lo,” kutsho uMnu Ndlovu.
UNkosazana Agnes Dube uthe sebehlalela evalweni ngenxa yezakhamizi ezathenga umbani njalo izulu leli seliqalile ukutshaya izifuyo kule indawo.
“Thina esingazange sawuthenga umbani lo sesiphila nzima ngoba siyesaba ukuthi mhlawumbe abawuthengayo bengasitshayisa ngawo. Ngikhuluma nje lokhe kwabonakala izakhamizi lezi zithengisa inkosazana izifuyo seziphelile zitshaywa lizulu.
“Mina nginje kimi litshaye obabhemi ababili lababulala khonapha yibo akade ngibathembile ekulimeni. Lokhu kwenza ngikholwe sibili ukuthi ngelithunywe ngabantu abafuna ngingalimi njalo kangikufihli kungangcono bengitshayise ngalo lami,” kutsho uNkszn Dube.
Ebuzwa ngale indaba uMnu Mapfumo uthe izulu leli ababelithengisa lalingelokwelapha abantu abatshaywe lizulu njalo elokutshayisa abantu ngeke balithengise egcekeni.
“Izulu esasilithengisa lalingelokwelapha labo abatshaywe lizulu hatshi elokutshayisa abantu. Elokutshayisa abantu sasingeke salithengisa egcekeni ngoba abantu bengasizonda. Labo abalezifuyo ezatshaywa lizulu kayisimi engazitshayisayo asazi kumbe zatshayiswa ngabanye abalithenga kwezinye indawo,” kuveza uMnu Mapfumo.
Usobhuku wakule indawo uMnumzana Norman Mnkandla uthe wakuzwa ukuba kulezakhamizi ezazithengisa inkosazana kodwa ngeke akhulume ngakho ngoba kakubonanga njalo kafuni ukuxabana labantu.
“Lami ngakuzwa sibili ukuthi kulezakhamizi ezazithengisa izulu sisemfeni yakoNcube kodwa ngeke ngakulandisa ngoba kangizibonanga njalo kangifuni ukuxabana labantu ngoba bengacina betshayisa mina,” kuphetha uMnu Mnkandla.
