uMthunywa
Thokozile Mbedzi
ABAZALI abalabantwana abafunda esikolo seNhwali eGwanda badla amalahle ngesenzo sikambalisi okubikwa utshaye omunye umfundi ilihlo ngemvubu walimala kabuhlungu.
Okwenza abazali bathukuthele kakhulu yikuthi umbalisi lo kaqalisi ukutshaya alimaze umfundi ngoba uke wenza isenzo esifanayo nyakenye.
Umbalisi lo okuzwakale ukuthi nguMnumzana Mahalimela kuphela utshaye umfundi lo ngeviki ephelileyo.
Ekhuluma loMthunywa umfakazi oqotho ubike ukuba umbalisi lo vele yinto yakhe ukutshaya abafundi.
‘‘Umbalisi lo ukutshaya ngokwakhe, uke watshaya omunye umfundi nyakenye walimala kabuhlungu kodwa indaba le yambambathwa. Khathesi usekuphindile njalo kunzima ukuthi bakuvale ngoba umlimaze ilihlo.
“Ilihlo leli liyesabeka, kalikhangeleki, asazi kumbe uzaphinda abone ngalo kodwa kangithembi,” kutsho lumfakazi.
Uqhubekele phambili waveza ukuba abazali bomntwana bazonde bagane unwabu.
“Badla amahabula abazali bomfundi otshayiweyo bathi bafuna ukuthola owabo umntwana elelihlo elingalimalanga, asazi ukuthi kuyozala nkomoni? Abazali laba zinjiva, asazi ukuthi umbalisi lo uzaqonda ngaphi ngesenzo sakhe lesi,” kuveza umfakazi lo.
Umzali womfundi lo esingeke samqamba ngebizo uthumele umlayezo kunkundla yokuxhumana ethetha ngokulinyazwa komntanakhe.
“Ilihlo lomntanami ngilifuna libona kuhle. Ngeke ngitshayelwe umntwana angani ngubabhemi. Asali ukuthi abantwana batshaywe kodwa kulendlela eqondileyo yokutshaya umntwana nxa eqondiswa.
“Nxa uMahalimela lo engafuni ukuthi sixabane kelaphise umntanami ilihlo leli liphole masinyane,” kubika umzali lo.
Ekhuluma lentatheli uProvincial Education Director uMnumzana Lefius Masukume uveze ukuba udaba lolu kalukafiki kuye.
“Udaba olunjalo alukafiki ewofisini yethu, mhlawumbe lusendleleni luyeza. Sizathi ukuluchwayisisa,” kuphetha uMnu Masukume.
