uMthunywa
Cornelius Luphahla loJohas Moyo
ITHWELE amagabha avuzayo imuli yakoMarakurwa ehlala endlini elekheli elithi 11398 eCowdray Park ngenxa kamninindlu osehluphile ngokungenela abesifazana balimuli esambuzi nxa begeza.
Kubikwa ‘‘umasitanda’’ uMnumzana Michael Sibanda ubengena esambuzi ngesikhathi sonke nxa sekugeza owesifazane oliloja.
Indaba le kubikwa yaqala ngenyanga kaMpalakazi lapho uMnu Sibanda angenela khona uMercy Ndlovu owayeloja lapha kanye loSisa umnawakhe kaNkosazana Thubelihle Nyathi begeza.
Kubikwa uSibanda wangenela amanina la kwaze kwaba kahlanu, okwadala ukuthi babaleke kule indlu.
UMnu Sibanda, ngemva kwalokhu wasala engenela uNkzn Nyathi.
UMthunywa ukhulumisane lesakhamuzi sakule indawo esingumakhelwane uNkosazana Zanele Mafu wachaza ukuthi uMnu Sibanda selesikhathi eside waqala ukuhlupha amaloja, ewangenela egeza.
“USibanda waqala kudala ukungenela amaloja akhe nxa egeza yikho engahlali lapha ebaleka. Ngikhuluma nje kumnyaka ophelileyo ubalekelwe ngamaloja kathathu wonke ethi abalekela ukuthi uyawangenela engangena esambuzini.
“Into emangalisayo yikuthi uhlupha nje indlu le kayisiyo yakhe ngekadadewabo yena sesenza angathi ngeyakhe,” kutsho uNkzn Mafu.
Ekhuluma lentatheli uNkzn Thubelihle Nyathi uveze ukuthi sekhathele ngokungenelwa nguSibanda seze wabavala lokuthi basebenzise isambuzi.
“Sengikhathele ngoSibanda sengize ngayabikela amapholisa ngale indaba kodwa lokhe engamanga ukungingenela esambuzini. Ngikhuluma nje ngemva kokuya emapholiseni sengingenele kathathu angazi ukuthi ufuna ngenzeni. Ngikhuluma nje kuthangi ngize ngalwa laye ethi ngingangeni esambuzini, sokuze kunamuhla kangingeni, labantwabami basebenzisa iganga.
“NgoMpalakazi kumnyaka ophelileyo ubehlala engenela umnawami evule izipha yebhulugwe ethi sephiswe kakhulu, asazi ukuthi kungani ehlala ephiswa nxa kungene umuntu wesifazana esambuzini. Ngikhuluma nje khathesi kasisagezeli esambuzini sesilindana nxa sigeza endlini sisesaba ukungenelwa,” kutsho uNkszn Nyathi.
UMnumzana Godwin Marakurwa ebuzwa ngale indaba uvumile ukuthi uyayazi.
“Kuliqiniso sibili ukuthi endlini lapha kasihlalisananga kuhle ngoba uSibanda uhlala exabana lathi ethi sibhadale imali ye-rent noma nje samxolisa samthembisa ukumnika kuyonale inyanga. Ukumbophisa sibili ngambophisa kodwa okunengi kwaziwa ngumkami,” kutsho uMnu Marakurwa.
Ebuzwa ngale indaba uMnumzana Michael Sibanda uveze ukuthi ubuhlungu ngale indaba njalo kafuni iphume kuphephandaba.
“Ngibuhlungu ngale indaba njalo okwenza ngithi uMaNyathi lemuli yakhe bengangeni esambuzini, yikuthi akulamanzi lapha endlini ngakho akuvumi ukuthi umuntu angene esambuzini kungelamanzi. Okokungenela abantu begeza mina kangikwazi njalo indaba le isemapholiseni ngilindele ukuya emthethwandaba kusasa.
“Noma kunjalo kangifuni ukuthi indaba le liyikhiphe kuphephandaba ngoba kangikayilungisisi,” kuphetha uMnu Sibanda.
