uMthunywa
YiNtatheli kaMthunywa
LIBIHLA ezimathonsi inina leTshabalala ngeloja lalo elithiya amagundwane ngesilaha. Akusaphilwa kuhle lapha ekhaya kubangwa amagundwane la.
Kubikwa ukuthi uNkosazana Takundwa Magocha ulwa leloja lakhe uNkosazana Janet Mlambo isizatho siyikuthi ubulalelani amagundwane endlini.
Intatheli ikhulumisane loMnu Thembani Ncube othe udaba lolu liqiniso ngoba kuhlala kungumsindo ngendaba yamagundwane.
“Kuhlala kuyimpi kubangwa amagundwane endlini kuthiwa yindaba ebulawa. Lokhu sekwenze abantu bacina becabangela ukuthi uNkszn Magocha kukhona akwaziyo ngamagundwane la.
“Uhlala ethembisa uNkszn Mlambo ukuthi engaqhubeka ebulala amagundwane la uzamxotsha endlini,” kuchaza uMnu Ncube.
Intatheli ikhulumisane loNkszn Mlambo ngalolu udaba wathi uhlala ethenjiswa ukuxotshwa endlini ngokuthi uthiya amagundwane.
“Amagundwane la angithwalise nzima kakhulu lapha ekhaya yikho nje ngiwabulala ngoba aqeda impahla zami. Okubuhlungu yikuthi uNkszn Magocha kafuni ngiwabulale wona esidla ukudla kwami.
“Nxa ngimbuza ukuthi kungani engafuni ngiwabulale uthi amagundwane akalacala lawo afuna ukuphila. Ngalokhu sengicabange ukuphuma endlini le ekupheleni kwenyanga yonale,” kuchaza uNkszn Mlambo.
Intatheli ikhulumisane njalo loNkszn Magoche ngaloludaba wathi akula magundwane owathi engabulawa ngoba kasiwakhe.
“Ngezake ngithi amagundwane angabulawa ngoba ayisiwo wami njalo amboni ukuthi ukhona ongafuna ukuhlala lamagundwane endlini yakhe,” kuchaza uNkszn Magoche.
