uMthunywa
YiNtatheli kaMthunywa
UMQEQETSHI weFC Platinum uNorman Mapeza uzethese umthwalo ongekho lula kuye labadlali bakhe nanko amathimu amathathu asekhefuzela eduzane kwesihlalo sokukhokhela ingalane yeligi yeCastle.
IFC Platinum yiyo esesiqongweni kuliligi ngemiklomelo engu-47, kodwa iCaps United isondele nge-46, kuthi iHighlanders ile-41.
Amathimu la womathathu yiwo alethuba lokuthi ayithwale inkezo.
Ngokuma kwengalane le, kuzathatha imidlalo emibili ukuthi kubonakale ukuthi uMapeza engayimela impi yokubusa kumdlalo wenguqu ephakemeyo kulisizini. Umqeqetshi lo usekhuze izimbamgodi zeFC Platinum zakhokhela okwamaviki ayedlula itshumi lane. Lakusizini ka2015, iFC Platinum yenelise ukuthi iqede kakuhle iqembu lakhe lingazange linqotshwe.
Ekhuluma lephephandaba likazulu kuliviki, ngesikhathi elolonga iqembu, uMapeza uthe uyazi ukuthi amathimu wonke akhangelele kubo.
“Kunzima ukukhokhela iligi ngalesi isikhathi. Sekusele imidlalo emilutshwane njalo lathi sesibona angathi sekuseduzane ukuthi sibezintshantshu. Sidlale kuhle lonyaka kodwa asikhohlwa ukuthi umncintiswano awukapheli,” kutsho uMapeza.
“Ngiyavuma ukuthi akukho lula. Silungiselela ukuthi singaphumi kusikhundla sethu phezulu, nanso iCaps United iseduzane. Lokho kusenza sizimisele, sidlale silolwazi lokuthi akulamdlalo omncinyane oseleyo. Angifuni ukuzifakela amehlo ngokubika ukuthi sizakuba zintshantshu.”
Umqeqetshi lo uqale isizini le elethimu exegayo kulandela ukusuka kwabadlali abedlula isithupha besiyadinga amadlelo aluhlaza kwezinye indawo.
Izazi zeligi yakuleli zatshaya iganga zathi uMapeza uziphosele egodini ngokuvuma umsebenzi lo kungela ngitsho abadlali abazwayo. Okwenzakale kuleliqembu kusukela ngoNkwenkwezi kuvuse amehlo abanengi abakade bengacabangeli ukuthi iFC Platinum ingadlala ibhola elizwayo.
UMapeza uthe uzagcizelela inkulumo ayitsho ekuqaleni komnyaka ukuthi iFC Platinum izaloba imbali ngokubisa inkezo yeCastle edolobheni leZvishavane.
“Ngakutsho ekuqaleni ngikhuluma lentatheli ukuthi siseduzane lokubhala imbali kuFC Platinum. Iqembu leli selizame kanengi lisehluleka ukuthi libe yintshantshu.”
Iphephandaba likazulu lizwe ukuba umqeqetshi lo wafunga wemba phansi ukuthi kasoze asuke kuFC Platinum engakaphakamisi inkezo enkulu.
Kusizini yeCastle PSL ka2014, iqembu leZvishavane leli litshibilike laba yinsika yethimu le eqede iyintshantshu yenkezo yeChibuku. Inkezo yeChibuku yiyo eyanikeza iqembu leZvishavane leli ithuba lokumela isizwe kumidlalo ye-Caf Confederations Cup.
UMapeza wetheswe ingqobe yokuthi aqhube ithimu le iphindele kumkhankaso weAfrica.Umqeqetshi lo ukhulume ngokufanayo ukuthi iqembu lakhe selikhangelele phetsheya ukudlala kuhle lamanye amathimu eAfrica.
“Ithuba lokuyancintisa eAfrica liyakhuthaza kakhulu. Umdlali munye ngamunye uyazi ukuthi lesi yiso isikhathi sokuziphakamisa,” kutsho uMapeza.
Imidlalo yeCastle PSL kuliviki:
NgoLwesine: Harare City v Highlanders (Rufaro), Chicken Inn v Mutare City (White City), How Mine v Hwange (Luveve).
