uMthunywa
Ethel Ncube
SINGUNDABAMLONYENI isiga esenzakale eChipale eBinga lapho esinye isakhamuzi esithume umangoye ukuthi ayebuza isikwelede se$20 kwesinye isakhamuzi.
Isiga lesi senzakale emavikini amathathu adluleyo lapho uMnumzana Jealous Mudenda athumele khona umangoye kuMnumzana Elka Ndlovu ukuba ayebuza isikwelede sakhe seRTGs$20 uMthunywa ukuzwile lokhu.
Ekhuluma lentatheli uMnumzana Zamani Sibanda uveze ukuba indaba yesikwelede le isegudwini kulindawo.
“UNdlovu waboleka imali kudala kuMudenda ubelokhu engakayitholi ukuthi ambhadale ngokutsho kwakhe.
“Uthi wathi elele wezwa kulento ephala isivalo wathi uyavula wathola umangoye kaMudenda emile emnyango ekhala wezwa kulomuntu othi isikwelede kodwa engaboni muntu ebona umangoye. Lokhu kwenza uNdlovu wacabanga ukuthi engxenye ukiti lo nguye othunyiweyo,” kubika uMnu Sibanda.
UMthunywa ukhulumisane loNkosazana Mercilin Nleya oveze ukuba udaba olunjalo lwenzakala.
“Indaba kamangoye iyahlupha wabonwa ngumnikazi owakweleda imali thina sezwa kuphela sekukhulunywa ukuba umangoye wayekhala esemnyango ephala isivalo sikaNdlovu uthe evula kwazwakala ilizwi lisithi ngiyayifuna imali yami wethuka umangoye laye wahle wanyamalala,” kubika uNkszn Nleya.
Ekhuluma lentatheli umnikazi kamangoye uMnu Mudenda walile ukuthi wathuma umangoye ukuyabuza isikwelede.
“Dade, umangoye uyahamba loba ngaphi njengoba engakhulumi ngangizamthuma njani abamekele ukiti wami wayezihambela. Ongikweledayo kalethe imali sitshiyane lokunengi,” kuveza uMnu Mudenda.
Iphephandaba likazulu lixhumane loMnumzana Ndlovu onguye owathunyelwa umangoye oveze ukuba ulesimanga ngalokho.
“Umangoye lo wabuya ekuseni kakhulu endlini singakavuki waphala isivalo ngaze ngavuka ngithe ngivula ngabona umangoye ekhala ngezwa kulomuntu othi imali yami kodwa ngingangaboni muntu uvalo lwangitshaya ngingani ngiyethuka umangoye engikhangele emehlweni. Isikwelede ngilaso sibili kodwa nxa sesithoniswa ngumangoye kunzima.
“UMudenda ngahamba ngayambuza ngomangoye wathi kakwazi lutho kodwa kimi umangoye wafika ebuza imali,” kuphetha uMnu Ndlovu.
