uMthunywa
Nkosilathi Sibanda
URALPH Nkomo umaneja kaNyasha Mushekwi umdlali wenguqu ubike ukuthi akazi lutho ngesivumelwano salumdlali ukuthi ayedlalela iqembu leDalian Yifang eleChina.
UMushekwi, obegijima kuqembu leMamelodi Sundowns usayine leDalian Yifang kumaviki adluleyo ngemva kokuhlala isizini yonke esubula ibhentshi.
Iminyaka emibili edluleyo ibilukhini empilweni kaMushekwi osebike kanengi ukuthi usefuna ukuphuma kuSundowns ngoba uhlukumezekile. Ukuthatha kwakhe inyathelo lokuya eChina alizange limangalise.
Kukhala umaneja wakhe kuphela.
UNkomo uthumele umbiko wokuthi akazange abe yingxenye yezingxoxo ebezikhona phakathi kweSundowns loMushekwi, ongaphansi kwakhe.
“Bengingekho kungxoxo ngesikhathi uNyasha esayina leqembu laseChina. Ngesikhathi esayina leqembu laseChina mina bengimatasatasa lelinye lase-Europe. Ingxoxo phakathi kwami laleliqembu besevuthisisa. “UNyasha ungaphansi kwami kodwa angimbambeli iqhubu ngendlela izinto ezenzeke ngayo. Isimo sakhe ngiyasizwisisa,” kutsho uNkomo.
Umaneja lo, odume ngokuphatha abadlali abadlala kumaligi amakhulu phetsheya kolwandle uthe akujwayelekanga ukuthi amaqembu ayeqe ama-agent kundaba zokuthengiswa kwabadlali.
“Loba kunjalo, ngithabile ukuthi ucine ephumile kuSundowns kodwa bengingafuni ukuthi ayedlala eChina.
Ngikholwa ukuthi uNyasha usaselekusasa enhle e-Europe. EChina uzohola kahle ngoba amaqembu akhona awawomeli lemali kodwa ngisafuna ukumbona ebuyela e-Europe.
“Ngikhulumile laye isikhathi eside ngemuva kokuthi esayine eChina. Kimi uNyasha ufana lomfowethu omncane.
Umfowethu omncane lihlezi lizoxabana ngoba kukhona izinto elingaziboni ngaso linye. Sisazoqhubeka lokusebenzisana laye. Ungumfana ozimiselayo,” kutsho uNkomo.
UMushekwi ubesasalelwe zinyanga eziyisithupha kuSundowns.
“Sengisebenze ebholeni isikhathi eside. Kulezinto okumele uzamukele njengomuntu. Nxa imali kungeke kube ngeyakho, kumele uvume. Okunye yikuthi ebholeni alikho iqiniso nxa sekukhulunywa ngezinto ezithinta izimali,” kutsho uNkomo.
