uMthunywa
UKUQHUBEKA kweLiverpool ukucindezela empini yesicoco sePremier League, akugxilanga kuphela kumabhola ahlohlwa ngu-Mohamed Salah kodwa lokubekezela lokuzethemba kukaSadio Mane.
Ukubekezela kukaMane yikho okungayigcina isegiyeni lejubane kuze kube yiyo ezatshaya intambo, yehlule iManchester City kunkezo yeligi.
Kusukela ngoZibandlela uMane usetshaye amagoli alitshumi emidlalweni engu-11 yeligi iLiverpool.
Lokhu kumbeka kwangu-16 eligi kule sizini kanti uSalah ule-18.
USalif Diao owayedlalela iLiverpool leSenegal kudala ukholwa ukuthi ifomu kaSalah yangesizini edluleyo imvukuzile uMane walwela ukungasali khatshana.
“Nxa ukhangela ngesizini edluleyo ngesikhathi kuphuma uhla lweBallon d’Or, uSalah ubelaphaya phezulu kodwa uSadio esezansi kanti umehluko kulokho kube ngamabhola ahlohliweyo,” kusho uDiao ku-Goal.com.
“USalah ubebukhali kakhulu phambi kwamapali, yilokho okwenze wathola imiklomelo ekupheleni komnyaka.
“Ngicabanga ukuthi uSadio ukuqaphele lokho, uyambona indlela asebenza ngayo kulisizini. Uyanemba emapalini, ubukhali futhi kuyawenza umehluko lokho.”
UMane usuka kude kwazise unconywa ngokuba yinkentshane nje, kulomdlalo okukholakala ukuthi yiwo owamvusa emaqandeni.
Lowo mdlalo ngowango-2017 Africa Cup of Nations eGabon lapho atshaya khona umbekwa.
— Ubulembu
