uMthunywa
Nkosilathi Sibanda
UMQEQETSHI weHighlanders uMandla Mpofu ubuhlungu ngendlela iqembu lakhe elilokhe lisadalala ngayo ukuhlohla ngesikhathi kumele lihlohle ukuze libalekele indawo elikuyo kuligi yeCastle Lager.
UMpofu kalitholi iqhinga lokulolonga abagadli bakhe okuthenjwe kubo ukuthi baligaxe entanjeni. Kumidlalo emibili ezibambile esihlalweni, uMpofu usephume lemiklomelo emibili, okuyimpumela engcono kulokunqotshwa kodwa yena ubika ukuthi kasuthiseki.
Ukungasuthiseki kwakhe kukhona lakubalandeli abacina ukuthokoza ukunqoba kweBosso ngelanga betshaya iDynamos eMagumeni.
“Siqhubeke ngokulolonga ikakhulu abagadli bethu ngaphambili ukuthi balole inyawo zokuhlohla. Siwafuna ngokuphangisa amabhola egedini,” kutsho uMpofu.
Abadlali beHighlanders sebehlohle amabhola angu-9 kuphela kusukela isizini ivulwa. Uze watshiya iqembu umqeqetshi omdala uMadinda Ndlovu ezama ukulola abagadli.
Kulabo ababukela inguqu, kusegcekeni ukuthi iBosso iyalichaya ibhola, iligiqe kungabonwa lutho kwamanye amaqembu. Inkinga ivela nxa sekumele ibhola liyefika emambuleni. Umgadli osathenjwe liqembu uPrince Dube usalidinga igedi.
Isifiso salumqeqetshi yikuqeda isizini ekunombolo yesine kodwa angeke akwenelise lokhu nxa ephethe ekunombolo yetshumi lane.
“Asitatazeli ngitsho loba sikusimo esingathabisiyo,” nguMandla lo.
Imidlalo yeCastle PSL kulimpelaviki:
Bulawayo Chiefs v Highlanders ( Barbourfields), Chapungu v Manica Diamonds, Blacka Rhinos v FC Platinum, Caps United v Ngezi Platinum , Harare City v Dynamos, Triangle United v Yadah, Mushowani Stars v ZPC Kariba, Hwange V TelOne, Chicken Inn v Herentals
